Fréttablaðið skýrir frá þessu í dag. Fram kemur að fyrirgreiðsla ríkisins muni eingöngu beinast að lausafjárvanda fyrirtækisins en ekki er ljóst hvort hann sé eina ástæða rekstrarvandans. Í minnisblaði til fjárlaganefndar er lítið fjallað um orsakir lausafjárvandans að sögn Fréttablaðsins.
Haft er eftir Ólafi Stephenssyni, framkvæmdastjora Félags atvinnurekenda, að hann geti ekki séð að rekstrarvandinn sé eingöngu tilkominn vegna taps á einkaréttarþjónustu Póstins en hann einn hefur heimild til að dreifa bréfum undir 50 grömmum. Ólafur bendir á að Póst- og fjarskiptastofnunin hafi í síðustu viku hafnað beiðni Íslandspósts um að fá að hækka gjaldskrá sína því afkoman af einkaréttarstarfseminni sé talin ágæt. Hann sagði að samkvæmt nýlegum úrskurði úrskurðarnefndar fjarskipta- og póstmála hafi umframhagnaður Íslandspóst af einkaréttarstarfseminni verið 16 prósent 2016 sem þýðir að sögn Ólafs að viðskiptavinir hafi greitt of mikið fyrir þjónustuna.
” Við erum algjörlega sannfærð um að það eru rangar ákvarðanir og fjárfestingar á samkeppnishliðinni sem ráða mjög miklu um þessa stöðu.“
Er haft eftir Ólafi sem hvetur fjárlaganefnd til að fara vel yfir ákvarðanir stjórnenda fyrirtækisins, uppbyggingu dreifikerfisins og ýmsan samkeppnisrekstur sem Pósturinn hafi ekki átt neitt erindi í og hafi ekki skilað neinum árangri.
„Það fer að verða áleitin spurning hver ætlar að axla ábyrgð á þeim röngu ákvörðunum sem leiddu til þessarar stöðu. Er það forstjóri fyrirtækisins, er það stjórnin eða er það ráðherra?“
Er haft eftir Ólafi.
Þess má geta að Svanhildur Hólm Valsdóttir, aðstoðarmaður Bjarna Benediktssonar, situr í stjórn Íslandspósts, sem varaformaður.