Markaðsvirði Icelandair Group nam um 37,9 milljörðum króna áður en félagið sendi frá sér tilkynningu þann 5. nóvember síðastliðinn um að félagið hygðist kaupa WOW air fyrir rúma tvo milljarða króna. Um leið og tilkynnt var um væntanleg laup, með fyrirvara um samþykki Samkeppniseftirlitsins, hluthafa og niðurstöðu áreiðanleikakönnunar, rauk gengi hlutabréfa Icelandair upp og hefur verið í hæstu hæðum síðan. Viðskiptablaðið greinir frá.
Alls hafa bréfin hækkað um 52 prósent frá því 5. nóvember og reiknast markaðsvirðið því 57,8 milljarðar. Hlutur Skúla Mogensen, stofnanda og eiganda WOW, verður því á bilinu 1-4 milljarðar, miðað við núverandi gengi bréfa Icelandair.
Boðað hefur verið til hluthafafundar hjá Icelandair þann 30. nóvember, þar sem kaupin verða borin undir hluthafa. Síðan Björgólfur Jóhannsson sagði starfi sínu lausu sem forstjóri Icelandair í viðleitni sinni til að axla ábyrgð á slæmri stöðu félagsins, hefur stjórn Icelandair leitað að nýjum forstjóra, bæði innanlands sem utan. Bogi Nils Bogason, sem ráðinn var forstjóri Icelandair tímabundið eftir að Björgólfur steig til hliðar, er sagður líklegur til að festa sig enn frekar í sessi sem varanlegur forstjóri fyrirtækisins eftir gott gengi félagsins undanfarið.