Erlent herlið hefur verið með daglega viðveru á Íslandi í samfellt þrjú ár. Alls 1220 hermenn voru hér á landi í fyrra, frá þrettán löndum, í alls fimm verkefnum tengdum hernaðareftirliti, eða æfingum.
Þetta kemur fram í svari utanríkisráðherra við fyrirspurn Andrésar Inga Jónssonar, þingmanns VG, um viðveru erlends herliðs á öryggissvæðinu á Keflavíkurflugvelli frá 2007-2017.
„Hvenær er herstöð herstöð? Dagleg viðvera herliðs á öryggissvæðinu á Keflavíkurflugvelli síðastliðin þrjú ár. Þýðir það að herstöðin hafi í reynd opnað aftur?“
spyr Andrés Ingi í tilefni svarsins.
Bandaríski herinn yfirgaf Ísland árið 2006 eftir 55 ára samfellda veru sína á Miðnesheiði. Síðan þá hefur NATO verið hér með loftrýmisgæslu, í umsjá ýmissa þjóða, auk þess sem margar heræfingar hafa verið haldnar hér á landi á þessum tíma. Er loftrýmisgæslan lang-algengasta tilefni viðveru herliðs hér á landi, en þar næst er árleg sprengjueyðingaræfing NATO, Northern Challenge.
Samkvæmt svari utanríkisráðherra hefur kafbátaeftirlit verið hér við lýði frá 2014, en um 60 manns koma að því að meðaltali, utan sérstaks stuðnings við kafbátaeftirlið, sem telur 12 manns:
„Á síðustu ellefu árum hefur viðvera erlends herliðs á öryggissvæðinu á Keflavíkurflugvelli verið mjög breytileg frá ári til árs, allt frá sautján dögum árið 2007 til þess að vera dagleg viðvera síðustu þrjú árin. Fjöldi liðsmanna hefur einnig verið mjög breytilegur, frá því að vera 225 árið 2007 í það vera nær 1.120 manns á síðasta ári. Loftrýmisgæsla Atlantshafsbandalagsins er langalgengasta tilefni viðveru erlends herliðs á Keflavíkurflugvelli. Næstalgengasta tilefnið er hin árlega sprengjueyðingaræfing Atlantshafsbandalagsins, Northern Challenge, sem Landhelgisgæslan stýrir, og þar á eftir kemur kafbátaeftirlit.“
