Íslenska krónan hefur veikst um 26 prósent gagnvart dollar frá því í apríl. Vilhjálmur Birgisson, verkalýðsfrömuður á Akranesi, vekur máls á því að nú liggi fyrir að veruleg verðbólga sé á næsta leiti:

„Ég get bara alls ekki séð hvernig á að ganga frá kjarasamningum á hinum almenna vinnumarkaði þegar það liggur fyrir áður en kjaraviðræður hefjast þá sé veruleg verðbólga á næsta leiti. En núna er dollarinn kominn í 124,19 og Evran í 139,90 og hefur krónan fallið gagnvart dollarnum um 26,19% frá apríl.“

Vilhjálmur blótar verðtryggingunni og uppreiknar hvað lítilsháttar hækkun á neysluvísitölu muni kosta heimilin í landinu:

„Það er morgunljóst að núna verðum við að tryggja að verðtryggðarskuldir heimilanna stökkbreytist ekki aftur eins og gerðist 2008 en þetta fall á krónunni sýnir okkur ruglið sem er í kringum þessa blessuðu verðtryggingu! Ég vil minna okkur öll á að 1% hækkun neysluvísitölunnar kostar heimilin 15 milljarða og 5% ársverðbólga kostar heimilin 75 milljarða! Afnám verðtryggingar er brýnasta hagsmunamál heimilanna!“