Ekkert verður af sameiningu Vopnafjarðarhrepps, Fljótsdalshéraðs, Seyðisfjarðarkaupstaðar, Borgarfjarðarhrepps og Djúpavogshrepps, eftir að meirihluti hreppsnefndar Vopnafjarðarhrepps felldi tillögu minnihlutans þess efnis á síðasta fundi. Frá þessu er greint í Austurfrétt.
Vísað er í íbúakönnun sem gerð var um málið, en þar lýstu 59% Vopnfirðinga yfir andstöðu sinni við slíkri sameiningu.
Samstarf hefur verið milli sveitarfélaganna um brunavarnir og félagsþjónustu og síðasta vetur fóru í gang viðræður um frekara samstarf á þeim grundvelli. Minnihlutinn nefndi í rökstuðningi að sameining væri rétt skref, í ljósi orða Sigurðar Inga Jóhannessonar, ráðherra sveitarstjórnamála, um að innan 4-8 ára kynnu sveitarfélög með færri en 1000 íbúa að verasameinuð með lögum.
Fulltrúar minnihlutans lýstu yfir vonbrigðum sínum með afgreiðslu meirihlutans og létu bóka eftirfarandi:
„Samfylkingin gagnrýnir harðlega afstöðu meirihlutans; afstöðu sem speglast af þröngsýni og einangrunarhyggju. Ákvörðun meirihlutans eru vonbrigði en vilji Samfylkingarinnar til sameiningarviðræðna er skýr.“
Í hreppsnefnd eru sjö manns, þrír frá Framsókn og óháðum, tveir frá Betra Sigtúni og tveir frá Samfylkingu. Meirihlutann mynda Framsókn og óháðir og Betra Sigtún.