Íslensk flugfélög mega ekki nýta sér stystu flugleiðina til Austurlanda fjær, sem liggur yfir Síberíu í Rússlandi. Því mun Icelandair og WOW ekki bjóða upp á flug til Kína, Japan eða Suður-Kóreu á næstunni, samkvæmt vef Túrista.

Viðræður milli íslenskra og rússneskra stjórnvalda um heimild íslenskra flugrekenda til yfirflugs hafa ekki skilað árangri, en fundað var í sumarbyrjun 2017 og aftur síðar um haustið. Frá þeim tíma hafa engar formlegar viðræður farið fram, aðeins óformlegar, að sögn utanríkisráðuneytisins.

Vefur Túrista greinir frá því að Rússar gætu sett það skilyrði fyrir slíkri yfirflugsheimild, að íslensk flugfélög hæfu beint flug til Rússlands fyrst, áður en flogið sé til áfangastaða í Japan eða Kína. Í dag takmarkist flugsamgöngur milli Íslands og Rússlands við sumarflug S7, rússnesks félags sem flaug einu í viku hingað til lands í sumar, en ætlar að fjölga í tvær ferðir á viku næsta sumar.

Íslenskum flugfélögum er heimilt að fljúga til Rússlands, að hámarki sjö sinnum í viku, en engar slíkar ferðir hafa verið í boði eftir að Icelandair hætti flugi sínu til St. Pétursborgar árið 2014.