Samtök atvinnulífsins segja frá því á vef sínum þann 10. nóvember að uppsögnum fari fjölgandi. Er vísað í niðurstöðu könnunar Maskínu sem gerð var fyrir SA. Þar kemur fram að aðildarfyrirtæki SA hafi sagt upp 3100 starfsmönnum síðustu 90 daga, en könnunin var gerð í lok október. Alls 612 fyrirtæki tóku þátt í könnuninni. Þar kemur einnig fram að áætlað sé hjá aðildarfyrirtækjum SA að segja upp 2800 manns til viðbótar næstu 90 daga eftir gerð könnunarinnar, þar af 1000 manns næstu 30 daga.

Alls 25 prósent þeirra fyrirtækja sem taka þátt í könnuninni meta það sem svo að uppsagnirnar í ár séu fleiri en á sama tíma í fyrra. Tíu prósent telja að þær séu færri, en flest fyrirtækin telja þó að uppsagnir séu svipað margar í ár og árið 2017, eða 65 prósent. Eru meginniðurstöður könnunarinnar sagðar vera þær, að uppsagnir hafi verið miklar undanfarna mánuði og sú þróun haldi áfram, auk þess að vera „mun fleiri“ en fyrir ári síðan.

Þess má geta að 612 fyrirtæki af 1700 tóku þátt í könnun Maskínu, sem gerir 36 prósent svarhlutfall.

Fá merki um breytingar á vinnumarkaði

Samkvæmt samantekt hagfræðideildar Landsbankans frá því í dag eru fá merki um slökun á vinnumarkaði. Er vísað í vinnumarkaðsrannsókn Hagstofu Íslands, sem segir atvinnuþátttöku 80,8 prósent hér á landi það sem af er árinu.

„Spenna á vinnumarkaðnum er því ekki að minnka miðað við þessar tölur og þær eru í ágætu samræmi við þær hagvaxtartölur sem Hagstofan hefur birt á árinu. Töluverður kraftur virðist því enn fyrir hendi á vinnumarkaðnum,“

segir í samantekt Landsbankans.

Samkvæmt mælingum Hagstofu Íslands var meðalatvinnuleysi síðustu 12 mánaða, 2,8 prósent í september, eða jafn mikið og á sama tíma í fyrra. Sama gildir um tölur Vinnumálastofnunar. Í september í fyrra mældist atvinnuleysi 2,2 prósent, sem er sama tala og mældist í september 2018.

Landsbankinn greinir frá því að í haust vildu 4% fleiri fyrirtæki fjölga starfsfólki en fækka því samkvæmt könnun Gallup meðal 400 stærstu fyrirtækja landsins. Þetta er sögð lítil breyting frá síðustu tveimur könnunum. Samkvæmt könnuninni má ætla að starfsfólki muni fjölga áfram í iðnaði og framleiðslu, sem og í verslun.

„Mikil eftirspurn eftir starfsfólki og áframhaldandi tilflutningur erlends vinnuafls eru vísbendingar um að staða launafólks á vinnumarkaðnum sé enn nokkuð sterk,“

segir Landsbankinn.

Og einnig:

„Fá merki eru um að staðan á vinnumarkaðnum mundi breytast mikið á næstu mánuðum þannig að vinna við kjarasamninga mun fara fram í vinnumarkaðsumhverfi sem er í þokkalegu jafnvægi og í sterkri stöðu.“