Samstaða er meðal flokka á þingi um að fjölga aðstoðarmönnum þingflokka um 17. Kostnaður við þetta er rúmar 120 milljónir en þetta fé rennur til aukinnar aðstoðar við þingflokka og þingmenn. Þingflokksformenn ætla að funda um málið í dag og reyna að ljúka afgreiðslu þess en enn hefur ekki náðst samkomulag um hvernig aðstoðarmönnunum verður deilt niður á þingflokkana.

Fréttablaðið skýrir frá þessu í dag. Fram kemur að samkvæmt þeim tillögu sem liggja fyrir sé gert ráð fyrir að þingstyrkur flokkanna ráði því hversu margar aðstoðarmenn þeir fá og að auki eigi hver flokkur að fá ritara. Þingflokkarnir geta síðan áfram ráðið sér ritara á eigin kostnað.

Forsætisnefnd þingsins samþykkti þessa fjölgun í sumar en markmiðið með henni er að efla Alþingi. Stefnt er að því að fjölga aðstoðarmönnunum í áföngum þannig að hluti þeirra taki til starfa um áramótin og síðan í tveimur áföngum í ársbyrjun 2020 og 2021.