Kolbrún Baldursdóttir, borgarfulltrúi Flokks fólksins, er afar gagnrýnin á viðtal Dags Eggertssonar borgarstjóra í Mannlíf nýverið. Í viðtalinu virðist Dagur afgreiða gagnrýni á borgarstjórnarmeirihlutann sem upphlaup. Dagur segir í viðtalinu: „Mér finnst vondur bragur á upphlaupum út af stóru og smáu. Það er nánast sama hvað er, það eru notuð alveg gríðarlega stór orð.“

Kolbrún sendi DV stutta yfirlýsingu vegna þessara ummæla:

„Upphlaup út af stóru og smáu,“ segir Dagur borgarstjóri í viðtali við Mannlíf, þegar minnihlutinn er að reyna að vinna sína vinnu. Hann ætti að prófa að vera hinum megin við borðið. Þaðan er útsýnið bara oft all-svakalegt. Hvert stórmálið hefur rekið annað frá vori sem einkennast af mistökum, andvaraleysi, broti á jafnréttislögum, dómur sem kostar borgina um 5 milljónir, framúrkeyrsla braggans og Mathallarinnar, OR vandamálið svo ég nefni nú nokkur. Sæti Dagur í minnihlutanum og væri að horfa á það sama og við myndi hann þá bara halla sér aftur og lygna aftur augunum? Ef hann gerði það myndi hann sennilega ekki afla sér mikilla vinsælda þeirra sem treystu á hann og gáfu honum atkvæði sitt í kosningunum í vor. Eigum við svo ekki að rifja aðeins upp ástandið t.d. í húsnæðismálum borgarinnar sem er uppsafnaður vandi því ekki hefur verið nægjanlega byggt í mörg ár. Eða 784 börn sem búa undir fátæktarmörkum og fleira mætti telja til eins og biðlista barna eftir þjónustu á vegum borgarinnar nánast hvert sem litið er.