Gunnar Smári Egilsson, stofnandi Sósíalistaflokks Íslands, segir að íbúðir sem borgarstjórnarmeirihlutinn hafi „hrannað“ upp í miðbænum, gangi ekki út. Kaupendum lúxusíbúða á Tryggvagötu 95 standi nú til boða 95% lán, en ódýrustu íbúðirnar seljast á rúmlega 680 þúsund krónur per fermetra:
„Þetta eru íbúðirnar sem Reykjavík skipulagði fyrir fólkið sem átti að hafa það svo gott í góðærinu, borgin trúði kosningaáróðri Bjarna Ben og félaga. Nú hefur komið í ljós að þetta fólk er ekki til, fólk sem vill og hefur efni á að kauða blokkaríbúðir á uppsprengdu verði.“
Gunnar segir að borgin hefði betur átt að byggja fyrir láglaunafólk og aðra hópa þar sem þörfin væri meiri:
„Því þarf að búa til svona sup prime-lán, húsnæðislán til þeirra sem hafa í raun ekki efni á að kaupa húsnæði, fær lán sem það er ekki borgunarmenn fyrir og sem mun missa húsnæði sitt þegar aðeins hallar í efnahagslífinu og bólan á húsnæðismarkaðnum dregst saman. Reykjavíkurborg hefði verið nær að byggja fyrir fólkið sem var í raunverulegum húsnæðisvanda; láglaunafólk, öryrkja, námsfólk, ungt fólk og aðra hópa. Í stað þess að þróa borgina með ímyndaða hagsmuni ímyndaðs fólks í huga.“
Dagur B. Eggertsson, borgarstjóri, svarar Gunnari í athugasemdakerfinu á Facebook. Hann segir borgina ekki koma að verðlagningu á íbúðum:
„Merkilega valið dæmi, því þessi lóð var ekki seld til verktaka heldur var hópur fólk sem meðal annars innihélt hönnuði og verkfræðinga hlutskarpast í útboðinu. Hugsun þeirra einsog því var lýst var að byggja þetta og búa þarna sjálf en selja aðrar íbúðir. Borgin kemur vitanlega ekki að verðlagningu þessara íbúða, hvorki til hækkunar eða lækkunar.“
Degi er svarað á þá leið að borgin virðist aldrei koma að uppbyggingu nauðsynlegra innviða, bent sé á hóp sérfræðinga og aldrei borin pólitísk ábyrgð. Þá er spurt hvað borgin geti gert til að tryggja það að ekki sé verið að byggja íbúðir sem almenningur hafi ekki efni á.
Því svarar Dagur:
„Leið okkar í því hefur verið að leggja megináherslu á samvinnu við óhagnaðardrifin byggingafélög (verkalýðshreyfigin, stúdentar, eldri borgarar og búseturéttarfélög). Alls eru þetta yfir 3.000 íbúðir. Hundruðir þeirra munu koma út á markaðinn á hverju ári næstu ár.“