Eins og sjá má á þessari mynd var oft stuð í gömlu flugstöðinni á Keflavíkurflugvelli hér í eina tíð. Eða jæja, myndin lýsir ekki alveg stemmingunni. Þetta var á árunum þegar utanlandsferðir voru ekki tíðar, en þá sjaldan að var lagt í hann þótti sjálfsagt að mæta eldsnemma að morgni út á völl og byrja að hella í sig bjór.
Hann fékkst jú ekki annars staðar – nema reyndar að fólk sem var í siglingum hafði vissan aðgang að þessum drykk sem Íslendingar sáu í hillingum.
Tveir til þrír bjórar að morgni fyrir flug þótti ekki mikið. Svo var hægt að halda áfram í flugvélinni. Oft var það þannig í vélum íslensku flugfélaganna að stór hluti farþega var ölvaður – eða jafnvel blindfullur.
Þegar komið var heim var talað um að lenda „annarri lendingu“ – það var að ná sér eftir fylliríið sem hófst í flugvélinni.
Drykkurinn sem var borinn á borð fyrir bjórþyrsta Íslendinga í gömlu flugstöðinni hét Polar Beer. Hann var sérstaklega framleiddur hérna fyrir sendiráð og varnarliðið á Keflavíkurflugvelli – auk flugstöðvarinnar. Þessi bjórtegund sást annars ekki á borðum Íslendinga – komst ekki út fyrir girðinguna í Keflavík.
Hún þótti fullgóð þá, en þegar menn smökkuðu síðar komust þeir að því þetta væri skelfing vondur bjór.
Nú eru á Bretlandi uppi ráðagerðir að banna morgundrykkju á flugvöllum. Bretar eru ein alkóhólíseraðasta þjóð í heimi. Stunda sitt á hvað og oft saman dagdrykkju, helgardrykkju og túradrykkju. Kunna einkennilega illa með vín að fara. Hafa verið svo mikil brögð að flugdólgahætti í bresku farþegaflugi að flugfélög þrýsta á um að vínstúkum á flugvöllum verði lokað. Oft þarf að lenda flugvélum til að koma fylliröftum frá borði með tilheyrandi skaða fyrir félögin – og aðra farþega. Síðar í vikunni verða kynntar fyrirætlanir bresku stjórnarinnar í þessa veru.
Tímarnir hafa breyst á Íslandi. Við erum sífellt á þeytingi inn og út úr landi. Flestir sem fara í flug fá sér vatn, kaffi eða aðra óáfenga drykki. Það er ekki oft að maður lendir í fullu fólki í flugvélum. Það gæti reyndar verið misjafnt eftir því hvert er flogið. Eða er einhver ástæða til að hefta áfengisdrykkju í flugstöð Leifs Eiríkssonar?
Ekki eru allir jafn hrifnir af þessu í Bretlandi. Hér má til dæmis sjá tvít frá ungum manni sem nefnist Alex Hess. Ef við getum ekki sest og fengið okkur volgan bjór klukkan sjö að morgni á Gatwick – getum við þá lengur kallað okkur Breta?