Guðjón Friðriksson sagnfræðingur birti þessa ljósmynd á Facebook. Hún er tekin fyrir rúmlega 60 árum en sýnir allt annan heim en við búum í. Ég fæddist ekki löngu eftir að myndin var tekin – sem staðfestir þann grun sem ágerist hjá mér að ég hafi verið uppi í gamla daga.

Myndin sýnir hersingu fólks ganga í góðviðri þar sem nú er Borgartúnið með bönkum sínum, byggingum fyrirtækja og bílastæðum – Borgartúnið erm mjög undarleg gata frá skipulagssjónarmiði. En þarna er er eiginlega ekki neitt. Það eru sama og engin hús við götuna og við horfum niður á sjávarkambinn, áttum okkur á því að núorðið eru þarna fyrir neðan stórar uppfyllingar og eftir þeim bruna bílar um Sæbrautina.

Það upplýsist á Facebook að þessi ganga hefur verið farin til að auglýsa happdrætti DAS – Dvalarheimilis aldraðra sjómanna. Hrafnista var reist með fé úr sjóðum happdrættisins. Á þessum árum má segja að Íslendingar hafi verið happdrættisóðir. Það var enginn hlutabréfamarkaður til þá.

Hér er svo auglýsing um happdrætti DAS. Þetta er bíla-, báta og búnaðarvélahappdrætti. Og þá skiljum við hvaða farartæki eru á ljósmyndinni, þetta er trillan sem var einn af vinningunum, dráttarvélin og Chevrolet-bifreiðin.