„Þá féllu tveir dómar vegna ólögmætra ákvarðana Sigríðar Á. Andersen dómsmálaráðherra. Viðbrögð hennar og flokkssystkina hennar voru að drepa alvarleika málsins á dreif, afvegaleiða umræðuna, bera saman ólíka þætti og á köflum fara með ósannindi til varnar ólögmætum gjörðum hennar. Það var ekki verið að dæma dómsmálaráðherra sem fyrirsvarsmann vegna ákvarðana undirstofnana heldur var verið að dæma íslenska ríkið bótaskylt vegna beinna aðgerða Sigríðar. Viðbrögðin minnka enn traust á stjórnmálum. Sigríður ætlar enga ábyrgð að bera né gerir flokkur hennar eða samstarfsflokkar í ríkisstjórn kröfu um það.“
Segir Helga Vala og segir að það skipti Vinstri græn og Framsóknarflokkinn meira máli að sitja í ríkisstjórn en ábyrgð ráðherra og heiðarleiki. Hún víkur því næst penna að nýjum upplýsingum sem Stundin birti í síðustu viku um fjármálagerninga Bjarna Benediktssonar, fjármálaráðherra, eftir að hann varð þingmaður og fram á haustið 2008. Eins og kunnugt er var sett lögbann á birtingu þessara upplýsinga en því var síðan hnekkt af dómstólum.
„Fyrir ári sagði Bjarni engar nýjar upplýsingar vera í ítarlegri umfjöllun Stundarinnar, The Guardian og Reykjavík Media um fjármálagerninga hans og fjölskyldu hans í aðdraganda hrunsins. Það sama segir hann í dag. Þetta er rangt því nú fáum við að sjá svart á hvítu að þvert á orð hans kom hann ítrekað fram fyrir hönd fjölskyldunnar í fjármálagerningum þeirra löngu eftir að hann settist á þing og fram að hruni að minnsta kosti. Þær upplýsingar sem hann hafði, umfram almenning, gerðu það að verkum að hann og fjölskylda hans seldu hlutabréf sín fyrir hátt í þrjú þúsund milljónir í aðdraganda falls bankanna. Hann sjálfur seldi hluti að verðmæti 50 milljónir króna í sjóði 9 síðustu dagana fyrir fall Glitnis en hafði áður neitað því. Seinna bar hann við að ástæða ósannindanna væri sú að það væri svo langt um liðið að hann hefði bara gleymt því, enda má segja að 50 milljónir séu ekki há fjárhæð miðað við þrjú þúsund milljóna sölu fjölskyldunnar.“
Segir Helga Vala um hlutabréfasölu fjölskyldu Bjarna og bætir við að samkvæmt nýjustu upplýsingum hafi Bjarni verið í beinu sambandi við yfirstjórn bankans fyrir hönd fjárfestingarfélags fjölskyldunnar, sem átti meðal annars stóran hlut í bankanum, árum saman eftir að hann tók sæti á Alþingi.
„Sjálfur hefur hann neitað því. Er þá ekki minnst hér á umfjöllun um eignir í skattaskjólum og Vafningsmálið. Traust verður ekki endurreist nema með heiðarleika og ábyrgð. Ef við viljum endurreisa virðingu Alþingis og traust á stjórnmálum er bara ein leið fær. Katrín Jakobsdóttir verður að marka leiðina.“