Hrólfur Jónsson, fyrrverandi skrifstofustjóri eigna og atvinnuþróunar hjá Reykjavíkurborg, mun fara á fund hjá innri endurskoðun borgarinnar vegna rannsóknar sem er í gangi vegna braggamálsins. Þetta staðfesti hann í samtali við DV. Mun hann mæta ein síns liðs og án lögfræðings. Hrólfur hefur sagt opinberlega að hann beri ábyrgðina á því að kjörnir fulltrúar Reykjavíkurborgar hafi ekki vitað um stöðu mála. Hrólfur hefur ítrekað tekið fram að Dagur B. Eggertsson hafi ekki vitað af þessari framúrkeyrslu á sínum tíma.
Hrólfur var stjórnandi hjá Reykjavíkurborg í rúma þrjá áratugi og var skrifstofustjóri skrifstofu eigna og atvinnuþróunar þegar verkefnið á Nauthólsvegi 100 var kynnt með pompi og prakt haustið 2015. Sama ár gerði verkfræðistofan Efla kostnaðaráætlun þar sem kom fram að heildarkostnaðurinn yrði mest um 158 milljónir króna. Nú þremur árum síðar er kostnaðurinn kominn yfir 415 milljónir. Hrólfur lét af störfum fyrr á þessu ári. DV hefur birt reikninga úr bókhaldi Reykjavíkurborgar sem varpa ljósi á hvað Reykjavíkurborg hefur verið að greiða fyrir í tengslum við verkefnið.
