Kostnaður Alþingis vegna varaþingmanna nam rúmlega 4 milljónum króna í vikunni, í vikunni sátu 10 varaþingmenn á þingi eða um 16% þingheims. Ástæðan fyrir þessum fjölda varaþingmanna skýrist að hluta til af alþjóðastarfi þingmanna í vikunni. Greint er frá þessu í Morgunblaðinu í dag.
Metár er í fjölda varaþingmanna en búið er að kalla inn varaþingmann í 57 skipti það sem af er árinu. Til samanburðar var talan 23 allt árið 2011. Varaþingmaður situr alltaf á þingi í heila viku þrátt fyrir að ekki sé endilega þörf á því.
Grunnkostnaður við varaþingmann er 350 þúsund krónur fyrir vikuna, ofan á það bætist ýmis kostnaður fyrir Alþingi, þar á meðal ferðir og uppihald. Meðalkostnaður á hvern varaþingmann í viku er því 402 þúsund krónur.