Hrólfur Jónsson, fyrrverandi skrifstofustjóri skrifstofu eigna og atvinnuþróunar, fullyrðir að Dagur B. Eggertsson borgarstjóri hafi ekkert vitað af því að braggaverkefnið í Nauthólsvík væri farið fram úr áætlun á undan öðrum borgarfulltrúum. Samkvæmt kostnaðarmati frá 2015 átti verkefnið í mesta lagi að kosta 158 milljónir, þegar málið kom upp á yfirborðið í ágúst síðastliðnum kom í ljós að kostnaðurinn er kominn yfir 400 milljónir. DV hefur í vikunni birt reikninga upp úr bókhaldinu sem sýna nákvæmlega fyrir hvað Reykjavíkurborg var að greiða fyrir í tengslum við verkefnið.
Sjá einnig: DV birtir allt braggabókhaldið
Vigdís Hauksdóttir, borgarfulltrúi Miðflokksins, fullyrti í viðtali við Viðskiptablaðið í síðustu viku að borgarstjóri hefði vitað af framúrkeyrslunni: „Það er enginn að segja mér að Dagur B. Eggertsson borgarstjóri hafi ekki vitað af þessari hundraða milljóna framúrkeyrslu við framkvæmdirnar við braggann sem við sitjum núna inn í, enda var farið að krukka í málið á síðasta kjörtímabili. En það átti bara að halda pottlokinu á lengur, bæði yfir þessu máli og fleiri stórum málum sem hafa verið að krauma undir yfirborðinu.“
Hrólfur Jónsson var stjórnandi hjá Reykjavíkurborg í rúma þrjá áratugi og var yfir skrifstofunni sem stýrði verkefninu frá því að ráðist var í það árið 2015 þangað til í apríl á þessu ári, starfar hann nú sem framkvæmdastjóri Vísindagarða Háskóla Íslands, sem verið að byggja í Vatnsmýri. Hann sagði í gær að hann bæri ábyrgð á því að láta ekki kjörna fulltrúa vita að verkefnið hefði farið svo langt fram úr áætlun.
Sjá einnig: Æsingur í Efstaleiti:„Ég ber ábyrgð“ – „Núna er einhver snitselumræða í gangi!“
Hrólfur starfaði í Ráðhúsinu en hann fullyrðir í samtali við Mbl að borgarstjóri og borgarfulltrúar hafi ekki frétt af framúrkeyslunni fyrr en í ágúst síðastliðnum. „Það er alveg á hreinu. Honum var ekki ljóst hvernig þessi staða var,“ segir Hrólfur. Segir hann einnig að málið sé eins og heit kartafla sem kastað sé á milli aðila.