Í nýútkominni skýrslu OECD um tölfræði menntunar Education at a Glance 2018 kemur fram að hátt hlutfall karla á Íslandi, eða 23,6% hefur ekki lokið námi á framhaldsskólastigi. Næst á eftir Íslandi koma Noregur (21,5%), Danmörk (20,5%) og Svíþjóð (19%).
Finnland er eina Norðurlandið sem sker sig úr í þessum samanburði en þar er mun lægra hlutfall karla sem ekki hefur lokið framhaldsskólaprófi eða rúm 11%. Í Evrópu eru aðeins fjögur lönd þar sem hærra hlutfall karla en á Íslandi hefur ekki lokið námi í framhaldsskóla en það eru Tyrkland, Portúgal, Spánn og Ítalía.
Þetta kemur fram í tilkynningu frá Menntamálastofnun sem vísar í umrædda skýrslu.
Þar segir að munur milli kynja sé fjórði hæstur á Íslandi í samanburði við önnur Evrópulönd OECD, eða um 9 prósentustig. Í Danmörku er munur milli kynja tæp 8 prósentustig og 3-5% á öðrum Norðurlöndum.
„Kynjamunurinn á Íslandi hefur þó minnkað umtalsvert frá 2003 á landinu í heild. Töluverður munur er enn á milli landsbyggðar og höfuðborgarsvæðis. Langmesta breytingu er að finna meðal kvenna á landsbyggð en árið 2003 var hlutfall kvenna á landsbyggð sem ekki hafði lokið framhaldskólaprófi 56% hjá 25-64 ára. Það er nú komið niður í 30% og er svipað og meðal karla á landsbyggð. Hlutfall kvenna á höfuðborgarsvæðinu sem ekki hefur lokið framhaldskólaprófi hefur einnig lækkað um nær helming, úr 32% í 18%. Meðal yngra fólks, þ.e. í aldurshópnum 25-34 ára hafa mun fleiri konur en karlar lokið framhaldsskólaprófi.“