Um þessar mundir er á Íslandi mikill fjöldi Nató-hermanna í aðdraganda gríðarstórra heræfinga sem fyrirhugaðar eru í Noregi. Liðsöfnuður þessi nýtir tímann til hvers kyns stríðsleikja hér á landi, þar með talið í Þjórsárdal n.k. laugardag þar sem fjölmennt lið mun æfa sig í að arka með hergög,“ segir í tilkynningu frá Samtökum hernaðarandstæðinga hér á landi.
Samtökin gagnrýna harðlega þessar heræfingar „með þeirri sóun og umhverfsskaða sem þeim fylgja“ eins og það er orðað í tilkynningunni. Minna samtökin á að í grunninn sé tilgangur æfinga sem þessarra að þjálfa menn í að drepa annað fólk.
„Í öðrum og óskyldum fréttum, vilja Samtök hernaðarandstæðinga tilkynna um sögu- og menningarferð sína um Þjórsárdal n.k. laugardag. Hópur friðarsinna mun þá halda að morgni dags frá Reykjavík og verja deginum við að skoða náttúru og söguminjar á þessu fallega landssvæði. Meðal annars verður ítarlega fjallað um sögu Gauks Trandilssonar á Stöng, sem felur í sér sígildan boðskap um fánýti ofbeldis.“
Í lok tilkynningarinnar kemur fram að samtökin óski þess að hermenn NATO muni ekki trufla ferðina eða spilla fyrir henni á nokkurn hátt. Þau séu þó við öllu búin.
Í frétt RÚV í fyrradag kom fram að 800 landgönguliðar verði við æfingar í Þjórsárdal um helgina. Ekki verði um eiginlega heræfingu að ræða heldur muni landgönguliðarnir ganga eftir vegslóðum. Passað verði upp á að ekki verði spjöll á umhverfi eða öðru.