„Íbúum hefur fjölgað svo mikið, allir skólar og leikskólar eru orðnir fullir. Þannig að við vildum ekki taka áhættuna og taka við allt of mörgum hælisleitendum,“ segir Kjartan Már Kjartansson, bæjarstjóri Reykjanesbæjar, í Morgunblaðinu í dag.
Velferðarráð Reykjanesbæjar hefur hafnað beiðni Útlendingastofnunar um að veita fleiri hælisleitendum þjónustu. Kjartan segir að íbúum hafi fjölgað mikið á svæðinu sem sé nú þegar „mettað af hælisleitendum“.
Kjartan segir við Morgunblaðið að bærinn þjónusti um 70-80 hælisleitendur á hverjum tíma. Staðreyndin sé sú að íbúum hafi fjölgað mikið og bærinn ekki getað byggt upp þjónustu sína í takt við þá fjölgun.
„Svo eru ríkisstofnanir eins og sjúkrahús og heilsugæsla líka langt á eftir í fjárveitingum. Þetta fólk þarf mikla þjónustu og mikla aðstoð fyrstu mánuðina og við teljum svæðið mettað af hælisleitendum. Þess vegna beinum við óskum og tilmælum til annarra sveitarfélaga á Íslandi að taka sinn hluta af þessari samfélagslegu ábyrgð,“ segir Kjartan.
Þórhildur Hagalín, upplýsingafulltrúi Útlendingastofununar, segir að í ljósi fjölgunar hælisumsókna þurfi stofnunin að stækka við sig. Stofnunin hafi þegar fengið húsnæði í Reykjanesbæ og raunar séð um rekstur úrræða fyrir þann umframfjölda umsækjenda sem samningar við sveitarfélög kveða á um.
Þó Reykjanesbær hafi ekki samþykkt tillöguna mun Útlendingastofnun nýta húsnæðið til þjónustu fyrir hælisleitendur.
„Við eigum í mjög góðu samstarfi við Reykjanesbæ og erum með samning við þau um þjónustu við umsækjendur um vernd. Að okkar mati er betra að sveitarfélögin sinni þessu hlutverki heldur en Útlendingastofnun, sérstaklega þjónustu við fjölskyldur. Það sem felst í þjónustunni er margt af því sem sveitarfélögin eru með á sinni könnu og þau eru með starfsfólk sem er með mikla reynslu og þekkingu á sviði félagsþjónustu,“ segir Þórhildur við Morgunblaðið í dag.