Samfylkingin mælist með 21,0 prósenta fylgi en Sjálfstæðisflokkur er langstærstur í borginni með 29,6 prósenta fylgi. Þetta er samkvæmt niðurstöðum könnunar Zenter sem unnin var fyrir Fréttablaðið og greint er frá á forsíðu í dag. Vinstri græn og Píratar bæta við sig fylgi ef miðað er við niðurstöður sveitastjórnarkosninga í vor en Samfylkingin dalar. Hún hlaut tæp 26 prósent í kosningunum í vor.
Píratar fengju 12,7 prósenta fylgi nú en fengu tæp 8 prósent í vor, Viðreisn mælist með rúm 9 prósent en fékk tæp 8 í kosningunum. Vinstri græn sækja í sig veðrið og fengju nú 8 prósenta fylgi en flokkurinn fékk 4,6 prósent í kosningunum.
Zenter kannaði einnig hvar ábyrgðin á framúrkeyrslunni í Braggamálinu liggur. Af þeim sem tóku afstöðu taldi þriðjungur að ábyrgðin væri Dags B. Eggertssonar borgarstjóra. Fjórðungur sagði að ábyrgðin lægi hjá meirihlutanum og álíka margir, rúm 26 prósent, sögðu að embættismenn ættu að axla ábyrgð.