Kolbrún Baldursdóttir, borgarfulltrúi Flokks fólksins, kunngerði Haraldi Flosa Tryggvasyni, stjórnarformanni Félagsbústaða, þá skoðun sína að hún teldi hann bera mestu ábyrgðina á framúrkeyrslunni sem varð við endurgerð 53 íbúða við Írabakka, á fundi sem Haraldur sat með fulltrúum minnihlutans í dag. Framkvæmdastjóri Félagsbústaða sagði af sér um helgina vegna málsins, en Kolbrún telur það ekki nóg:
„Ég tel að Haraldur hljóti að vera aðalábyrgðar maður í þessu og sé ekki að fyrirtækið geti öðlast traust nema meiri endurnýjun eigi sér stað, það er að segja með stjórnarformanninum. Hugsanlega mætti skoða fleiri þætti sem breyta þurfi einnig. Ég tilkynnti honum mína afstöðu en hún er sú að hann eigi að segja af sér,“
sagði Kolbrún við Eyjuna. Enginn annar borgarfulltrúi fór fram á afsögn Haraldar.
Líkt og Eyjan greindi frá í morgun fór framkvæmd Félagsbústaða við endurgerðina á íbúðunum 330 milljónir fram úr kostnaðaráætlun, eða sem nemur 83 prósentum.
Sjá nánar: Félagsbústaðir fóru 330 milljónir framúr áætlunum við endurbætur – Framkvæmdastjórinn sagði af sér
Kolbrún lagði fram tillögur í borgarstjórn um úttekt á viðhaldsþörf og könnun á þjónustu og viðmóti Félagsbústaða. Tillögunum var vísað til Félagsbústaða sem bíða þar afgreiðslu.
Kolbrún er vongóð um að þær verði teknar upp þar, ekki síst eftir að Laufey Ólafsdóttir, fulltrúi Sósíalista og leigjandi hjá Félagsbústöðum var kosin í stjórn Félagsbústaða.
„Það er margt sem enn má laga hjá Félagsbústöðum og ekki eru öll kurl komin til grafar ennþá. Það er enn heilmargt sem er óljóst í þessu. Og síðast í morgun bárust nýjar kvartanir sem þarf að skoða nánar, án þess að ég geti tjáð mig um það á þessu stigi,“
sagði Kolbrún.
