Viðar Guðjohnsen kennir femínistum og konum almennt um það að Kristinn Sigurjónsson hafi verið rekinn úr starfi sem kennari við Háskólann í Reykjavík. Viðar var gestur Frosta og Mána í Harmageddon í höfuðstöðvum Vodafone að Suðurlandsbraut. Viðar sem tók þátt í leiðtogakjöri Sjálfstæðisflokksins í Reykjavík í byrjun árs var mikið niðri fyrir í viðtalinu sem var með nokkrum ólíkindum. Þar skiptist hann á að höggva í átt að þáttastjórnendum og svo konum almennt. Viðari hefur verið lýst sem hreinræktuðum frjálshyggjumanni og að pólitískar hugmyndir hans gangi út á afgerandi stefnu frjálshyggjunnar þar sem æskilegt er að hinir veiku verði undir. Í þættinum sauð upp úr og Viðar sagði stjórnendur heilaþvegna, undirlægjur og þeir væru ekki starfi sínu vaxnir.

Viðar ræddi um brottrekstur Kristins og kennir eins og áður segir femínistum um en hann segir femínista búna að síkja allt samfélagið. Viðar og Kristinn þekkjast og lýsir Viðar honum sem frábærum og heiðarlegum manni sem hafi verið kúgaður úr starfi af frekjufemínistum. Viðar tekur í svipaðan streng og annar Sjálfstæðismaður, Brynjar Níelsson, nema Viðar gekk skrefinu lengra og kenndi konum almennt um að svona hefði farið.

„Það er verið að búa til vandamál í samfélaginu, vegna þess að konur í yfirgangi og frekju eru hættar að hugsa um börnin sín,“ sagði Viðar.

Frosti vildi þá meina að ekki væri hægt að kasta sök á allar konur og Máni bætti við að þetta hefði ekkert með konur að gera en Viðar greip strax fram í og sagði:

„Víst, vertu ekki með þennan sleikjugang, þú ert svo mikil undirlægja.“

Við hélt áfram að tala niður til kvenna:

„Konurnar vilja ekki ala upp börnin því þær eru með menntasýki, þær vilja börn og vera í metnaðarfullu starfi en þetta fer ekki saman frá náttúrunarlögmálunum. Þú getur ekki alið upp barn nema að sinna því sjálf og þá er stofnun látin ala upp barnið, þá er þetta orðinn geymslustaðir fyrir börn.“

Þegar Viðar var spurður hvort ekki væri hægt að finna hinn gullna meðalveg svaraði hann:

„Ekki þegar öfgastofnun femínisma og vinstrisinnaðsfólks flytja inn fólk, skapa glundroða í skólakerfinu. 83 prósent kennara eru konur, 30 drengja geta ekki lesið sér til gagns, aðeins 12 prósent stúlkna. Það er eitthvað mikið að í okkar samfélagi og þetta er frekjugangur femínisma að kenna.“

Viðar vildi svo einnig kenna femínismum um að öryrkjum undir fertugu hefði fjölgað í samfélaginu og notaði tækifærið til að hrósa Páli Magnússyni öðrum Sjálfstæðismanni.

„Konur eru í menntasýki og metnaðargirni og vilja vera úti á vinnumarkaði í stórum í mæli og þá sitja vanrækt börn heima.“

Máni spurði þá hvort ekki væri ósanngjarnt að beina kastljósinu aðeins að konum, hvort hann væri ekki að gleyma körlunum í þessu samhengi en frambjóðandinn fyrrverandi var með svar á reiðum höndum:

„Það er búið að berja og píkupíska karlmenn svoleiðis að þeir mega ekki segja orð.“

Þessu mótmælti Máni og Viðar svaraði:

„Þú ert svo kúgaður Máni. Þið eruð ekki starfi ykkar vaxnir.“

Viðar var þá spurður hvort hann vildi virkilega að skólarnir stæðu yfir í takmarkaðan tíma og börnin yrðu að mestu hjá móður sinni sem væri þá nánast eingöngu heimavinandi húsmóðir:

„Ég hef ekkert á móti því að konur vaski svolítið sjálfar upp, taki til og séu ekki alltaf að berja á karlmanninum eins og er alltaf er að koma meira í ljós. Ef þið ætlið að eiga börn, skulið þið taka þeim skyldum líka, að það er vinna að eiga barn.“

Þegar Harmageddon bræður mótmæltu uppnefndi Viðar Mána kúgari sem væri eins og starfsmaður CNN sem færi stanslaust með rangfærslur. „Þið eruð valdir til að vera hér,“ sagði Viðar: „Þið vitið ekki einu sinni að þið eruð strengjabrúður fyrir alþjóðahyggju.

Máni og Frosti sögðu þá að Viðar gæti ekki alhæft um konur eins og hann hafði gert fram að þessu:

„Hvernig var #metoo-hreyfingin, þar voru allir karlmenn nauðgarar og það má ekki segja stygðaryrði um þær og þið eruð heilaþvegnir af þessu fólki,“ sagði Viðar sem rauk síðan fljótlega á dyr. Hér má hlusta á þetta ótrúlega viðtal.