Þann 18. ágúst á síðasta ári var óskað eftir áliti borgarlögmanns á hvort samningar um framkvæmdina við braggann margumrædda í Nauthólsvík væru samkvæmt þáverandi regluverki um opinber innkaup. Þetta álit hefur ekki enn borist en borgarlögmaður stefnir á að leggja það fram á fundi innkauparáðs borgarinnar þann 18. október næstkomandi, 14 mánuðum eftir að beðið var um það.

Morgunblaðið skýrir frá þessu. Fram kemur að rúmt ár sé síðan innkauparáð borgarinnar hafi óskað eftir sundurliðun á reikningum vegna einstakra innkaupa í tengslum við braggaframkvæmdina. Á fundi ráðsins í júní á síðasta ári var lagt fram yfirlit yfir einstök innkaup yfir einni milljón króna. Í framhaldi af þessu óskaði ráðið eftir frekari sundurliðun og upplýsingum um hvort samningar hefðu verið gerðir að undangengnu formlegu ferli á grundvelli innkaupareglna.

Kostnaður vegna framkvæmdanna var kominn í tugi milljóna króna strax á fyrstu mánuðum síðasta árs. Síðan þá hefur kostnaðurinn farið úr nokkrum tugum milljóna í rúmlega 400 milljónir.