Vilhjálmur Bjarnason, fyrrverandi þingmaður Sjálfstæðisflokksins, segir það marklaust af Alþingi að ætla að biðja Geir Haarde, fyrrverandi forsætisráðherra, afsökunar á Landsdómsmálinu. Í grein sem hann ritar í Morgunblaðið í dag segir Vilhjálmur það skorti á þakklæti í stjórnmálum og tekur hann sjálfan sig sem dæmi. Þá líkir hann einnig sakborningum í dómsmálum eftir hrun við nasista.
Hann segir að nýir flokkar á þingi stundi það að bera sakir á fólk án þess að það geti borið af sér sakir og segir hann að „kunn þingkona“ hafi í tvígang „drullað“ yfir sig vegna gagnrýni hans á sölu Búnaðarbankans, í annað skiptið var það í anddyri Útvarpshússins. Talar Vilhjálmur einnig um skort á þakklæti í stjórnmálum og tekur hann sjálfan sig sem dæmi:
„ Þannig vann sá er þetta ritar ágætan sigur í prófkjöri í sínum Flokki, með því að fara eftir þeim reglum sem Flokkurinn hafði sett. Síðan var honum rennt niður listann um eitt sæti, eins og hverjum öðrum mannlegum óþverra, án þess að nokkur segði við hann aukatekið takk, fyrir að halda frið.“
Varðandi þingsályktunartillöguna um að þingið skuldi Geir afsökunarbeiðni segir Vilhjálmur það hafa verið rangt að draga hann fyrir Landsdóm en slík afsökunarbeiðni sé marklaus þar sem ekki sé hægt að biðjast afsökunar fyrir hönd annarra, þar sem þingmenn sem bera fram tillöguna sátu ekki á þingi þegar Geir var ákærður:
„Þeir sem enn sitja á Alþingi og greiddu atkvæði með málshöfðun á hendur Geir H. Haarde geta viðurkennt illvirki sitt og beðið um fyrirgefningu. Þeir sem ekki sitja lengur á Alþingi geta einnig viðurkennt illvirki sitt og beðið um fyrirgefningu.“
Segir Vilhjálmur að það að bera af sér sakir eigi heima hjá dómstólum. „Ef Íslendingar og Bretar vilja gera upp sín mál verður það ekki gert með afsökun eða fyrirgefningu. Ekki hafa bankastjórar Landsbankans eða eigendur hans beðið Breta fyrirgefningar á að ræna sparifé þeirra með Icesave.“
Vilhjálmur segir svo að enginn sem komið hafi að hruninu 2008 hafi beðist fyrirgefningar og ber hann saman sakborninga í dómsmálum eftir hrun við nasistana sem voru dregnir fyrir dóm í Nurnberg og víðar:
„Það er sammerkt með þeim er misgjörðu við þessa þjóð í hildarleik fyrir tíu árum að þeim hefur ekki til hugar komið að biðjast fyrirgefningar. Allir sem hafa komið fyrir dómstóla vegna óhæfuverka og óhæfuverka sinna hafa lýst sig saklausa, rétt eins og allir þeir sem komu fyrir dóm vegna verka sinna fyrir „Þriðja ríkið“ í seinni heimsstyrjöldinni. Allir lýstu þeir sig saklausa.“