Sólveig Anna Jónsdóttir og Viðar Þorsteinsson, formaður og framkvæmdastjóri Eflingar-Stéttarfélags, voru harðlega gagnrýnd á starfsmannafundi í gær fyrir að hafa ekki svarað þeim gífuryrðum og árásum Gunnars Smára Egilssonar á hendur fjármálastjóra Eflingar, líkt og Eyjan og DV hafa fjallað um.
Morgunblaðið greinir frá þessu í dag og vísar í ónefndan starfsmann félagsins:
„Hver á fætur öðrum lýsti óánægju sinni með þegjandahátt tvímenninganna og frómt frá sagt var fátt um svör hjá Sólveigu Önnu og Viðari Þorsteinssyni.“
Þá var fundið að þeim vinnubrögðum stjórnandanna, að hafa ekki getið þessarar óánægju í yfirlýsingu sinni „Vegna umfjöllunar í fjölmiðlum“ sem þau birtu eftir fundinn. Í henni kemur þó fram að þau beri traust til starfsfólksins.
Hinsvegar vildi Viðar Þorsteinsson ekki tjá sig um hvort hann bæri traust til fjármálastjórans, samkvæmt frétt Stöðvar 2 í gærkvöldi.
Sjá einnig: Gunnar Smári er fokillur út í Kristjönu – „Ég bið ekki að heilsa henni ef þið rekist á hana“
Morgunblaðið segir í fréttaskýringu sinni að ekki sé allt með felldu og gefur í skyn að um óvinveitta yfirtöku á Eflingu sé að ræða. Er loftið sagt lævi blandið á skrifstofunni, hjá þessu næststærsta stéttarfélagi landsins, sem telji um 19.000 manns.
Segir Morgunblaðið að samkvæmt sínum upplýsingum stjórni þau Sólveig Anna og Viðar með harðri hendi og fólki sé hótað með áminningu í starfi „af minna en engu tilefni.“
Aðspurð um ástæður þess að fjármálastjórinn og bókarinn, tveir af reynslumestu starfsmönnum skrifstofunnar, væru komnir í ótímabundið veikindaleyfi, neitaði Sólveig Anna að svara efnislega og bar við trúnaði við starfsmenn, samkvæmt Morgunblaðinu.
Samkvæmt heimildum Morgunblaðsins er ástæðan sú að fjármálastjórinn neitaði að greiða reikninginn frá eiginkonu Gunnars Smára Egilssonar, stofnanda Sósíalistaflokks Íslands og eins helsta stuðningsmanns Sólveigar Önnu, nema með samþykki stjórnarinnar fyrir reikningnum. Sá háttur ku hafa verið byggður á áratuga hefðum, sem aldrei hafi verið vefengdur fyrr en nú, samkvæmt Morgunblaðinu.
Morgunblaðið fjallar einnig um „hallarbyltinguna“ í vor þegar Sólveig Anna var kosin formaður:
„Sólveig Anna kom svo til fundar á skrifstofu Eflingar, vopnuð hægri hönd sinni, Viðari Þorsteinssyni, og kynnti hann til sögunnar á fundinum sem sinn næstráðanda og rak þannig skrifstofustjórann, Þráin Hallgrímsson, nánast í beinni útsendingu og án þess að eiga orðastað við hann um þessa fyrirætlan sína. Áður höfðu Sólveig Anna og Viðar losað sig við hagfræðing félagsins, Hörpu Ólafsdóttur. Samkvæmt heimildum Morgunblaðsins mun tvíeykið, Sólveig Anna og Viðar, hafa gefið það út að ekki yrði um frekari hreinsanir á skrifstofu Eflingar að ræða, af þeirra hálfu.“
Samkvæmt Morgunblaðinu mun afgreiðsla fjármálastjórans á reikningi eiginkonu Gunnars Smára hafa komið við kaunin á Sólveigu og Viðari, sem hafi hlaupið kapp í kinn og viljað leiðrétta hver tæki ákvarðanir um fjármál, eða annað.
Og þegar bókari til 15 ára tók afstöðu með fjármálastjóranum, hafi viðkomandi fallið í ónáð hjá Sólveigu og Viðari.
Aðspurð af Morgunblaðinu um þessa lýsingu atburða og hvort hún gæti staðfest þá lýsingu, sagði Sólveig Anna:
„Jahá! Plot thickens! Ég skal segja þér það í fullum trúnaði, að þarna er ekki rétt farið með, en að öðru leyti ætla ég ekki að tjá mig um þetta mál.“
Sólveig Anna neitaði að tjá sig við Morgunblaðið þegar hún var spurð út í það hvort hún ætlaði að viðhalda þeirri hefð sem ríkt hefði frá tíð Guðmundar Jaka, að hvorki formenn né æðstu starfsmenn félagsins væru prókúruhafar þess, því meginreglan væri að sú að aðskilja bæri ákvörðunarvaldið frá reikningshaldinu og útgáfu peningalegrar ábyrgðar.