Dagur B. Eggertsson, borgarstjóri, segir í vikulegu fréttabréfi sínu, að braggamálið kalli augljóslega á skýringar. Mun meirihlutinn leggja fram tillögu á morgun til að komast til botns í málinu:

„Í borgarráði á morgun er margt á dagskrá en einna hæst ber tillögu meirihlutans um málefni braggans í Nauthólsvík. Endurgerð húsanna og braggans í Nauthólsvík er alvarlegt dæmi um framkvæmd sem fer langt fram úr áætlun. Fregnir af einstaka reikningum og verkþáttum undanfarna daga kalla augljóslega á skýringar og undirstrika mikilvægi þess að málið er komið í hendur innri endurskoðunar Reykjavíkurborgar. Til að undirstrika alvöru málsins leggur meirihlutinn í borgarstjórn fram tillögu til samþykktar í borgarráði á morgun til að árétta að enginn angi málsins skal vera undanskilinn og allt skal upplýst í þessu máli frá upphafi til enda.“

Dagur skýrir ekki út hvers vegna tillagan er lögð fram fyrst núna, þar sem lengi hefur legið fyrir að kostnaður vegna braggans fór langt fram úr áætlunum.

Í gær greindi DV frá því að sérinnflutt, höfundaréttarvarinn strá frá Danmörku hefðu verið gróðursett fyrir utan braggann. Kostuðu þau 757 þúsund krónur.

Sjá nánar: Þessi strá fyrir utan braggann kostuðu 757 þúsund krónur – Höfundaréttavarin og keypt frá Danmörku

Sjá einnig: Braggablúsinn kominn í 415 milljónir -Endanlegur kostnaður liggur ekki fyrir

Sjá einnig: Braggablús borgarinnar:Náðhúsið kostaði 46 milljónir – „Hér hafa verið gerð stór mistök“

Sjá einnig: Vigdís tók myndir inn um gluggann á „klósettinu“ í Nauthólsvík:„Ég er þrumu lostin yfir þessu ástandi“