Össur Skarphéðinsson, fyrrum ráðherra og formaður Samfylkingarinnar, er einnig með doktorspróf í lífeðlisfræði með fiskeldi sem sérgrein. Umræðan um fiskeldi er nú í hámæli, eftir að ákvörðun Matvælastofnunar um rekstrarleyfi tveggja fyrirtækja fyrir laxeldisframleiðslu var afturkölluð af úrskurðarnefnd umhverfis- og auðlindamála.
Eftir mikla reiðiöldu í kjölfarið og fundarhöld stjórnvalda, hyggst sjávarútvegsráðherra leggja til frumvarp um breytingar á lögum um fiskeldi, til að laga „annamarka“ þá sem eru í lögunum með vísun í afturköllun leyfanna, sem hefur víðtæk áhrif á líf fólks á Vestfjörðum.
Össur rifjar upp sín afskipti af fiskeldi:
„Af geldlöxum og stórlöxum. Ég kom heim frá námi á síðustu öld og vann í kjölfarið stóran rannsóknarstyrk til að flytja hingað og þróa við íslenskar aðstæður aðferðir til að framleiða eldislax, sem aldrei varð kynþroska. Þá strax var uppi ótti við erfðamengun af völdum strokulaxa. Ókynþroska lax er hins vegar með öllu áhugalaus um do-do og spillir því engum erfðum. Ég var giska montinn þegar ég skilaði af mér og Vilhjálmur Lúðvíksson, framkvæmdastjóri Rannsóknarráðs sagði að þetta væri örugglega framtíð laxeldis á Íslandi. Öðru nær. Hvorki eldismenn og enn síður stangveiðifélögin sýndu þessu nokkurn áhuga. Ég átti fótum fjör að launa í annars konar brauðstrit. Það endaði með þeim ósköpum að þegar mamma heitin leit háöldruð yfir æviveginn sagði hún mæðulega við systur sínar. “Það fór ekki vel með Össa minn. Honum töpuðum við í pólitík.”
Í athugasemdarkerfinu er birt gömul DV frétt frá 2007, þar sem fjallað er um fiskeldistilraunir fyrri ára, sem þóttu mistakast herfilega. Þar eru ummæli frá Össuri, sem sat áður í stjórn Framkvæmdarsjóðs, sem lagði mikið fé í laxeldið:
„Ég kom víða við í þessu dæmi og endaði sem aðstoðarforstjóri Reykvískrar endurtryggingar sem tryggði fiskeldið. Þetta var þannig að menn voru hvattir til þess að leggja út í fiskeldið. Stjórnmálamenn sögðu að þeir myndu sjá til þess að menn gætu komið undir sig fótunum í þessu. Svo kom í ljós að það var nánast ekki hægt að vera hér með fiskeldi í hafinu. Þá fóru menn að vera með þetta í steyptum tönkum í landi. Þetta voru gríðarmikil mistök.“