Gunnar Smári Egilsson, stofnandi Sósíalistaflokks Íslands, tekur undir orð ASÍ sem segir Fangelsismálastofnun brjóta lög með því að selja út vinnu fanga, sem séu á launum langt undir kjarasamningum. Þannig taki fangar vinnu af iðnaðarmönnum með undirboði stofnunarinnar, en ASÍ hefur fengið ábendingar um að Fangelsismálastofnun selji vinnu fanga á Kvíabryggju, samkvæmt frétt RÚV frá því í gær.
Gunnar Smári segir:
„Páll Winkel leigir fanga út í verkamannavinnu fyrir 800 kall á tímann, lætur fangana fá 415 kr. en tekur mismuninn upp í kostnað. Hvernig getur þetta verið löglegt? Af hverju er Páli ekki stungið inn?“
spyr Gunnar Smári, en samkvæmt ASÍ eru fangarnir með 415 krónur á tímann, þó fangelsið rukki 800 krónur á tímann. Mismunurinn sé vegna fyrirhafnar og kostnaðar. ASÍ telur að fangelsi hafi ekki heimild til að selja út vinnu fanga undir taxta, lög geri ráð fyrir að fangi sem vinni utan fangelsis fái greidd skattskyld laun.
