Borgarráðsfulltrúar Samfylkingar, Viðreisnar, Pírata og Vinstri grænna munu leggja fram tillögu þess efnis á næstkomandi borgarráðsfundi að heildarúttekt á endurgerð braggans við Nauthólsveg 100 verði gerð. Í tillögunni kemur meðal annars fram að borgarfulltrúar meirihlutans krefjist heildar rannsóknar á öllum hliðum svokallaða braggamáls.

„Borgarráð samþykkir að fela Innri endurskoðun Reykjavíkurborgar að ráðast í heildarúttekt á
öllu því ferli sem endurgerð braggans fól í sér. Enginn angi málsins skal vera undanskilinn og
allt skal upplýst í þessu máli frá upphafi til enda. Einnig er óskað eftir því að Innri
endurskoðun Reykjavíkur geri tillögur að umbótum í tengslum við það sem aflaga hefur farið
og í bága við vandaða stjórnsýsluhætti“ segir í samþykkt borgarráðs.

Í samtali við Eyjuna sagði Dóra Björt Guðjónsdóttir, borgarfulltrúi Pírata og forseti borgarstjórnar, að hún muni persónulega berjast gegn spillingu, fúski og óvönduðum vinnubrögðum.

„Ég get, fyrir hönd Pírata, lofað því að við erum að komast til botns í þessu máli. Þessi tillaga er skref í átt að því að upplýsa málið, sýnir að okkur er alvara og að það verður enginn feluleikur í kringum hvað fór úrskeiðis. Við erum aðhaldsafl gegn spillingu, fúski og óvönduðum vinnubrögðum í meirihluta alveg eins og í minnihluta. Við ætlum að sýna borgarbúum það í verki í þessu máli.“ Dóra segir einnig að þessi tillaga gangi enn lengra en tillaga Vigdísar Hauksdóttur, borgarfulltrúa Miðflokksins um rannsókn á málinu.

Píratar í Reykjavík munu halda fund um málið laugardaginn næstkomandi í félagsheimili Pírata og er yfirskrift fundarins Braggasukkið í Nauthólsvík. Mun fundurinn byrja klukkan 13:00 og munu borgarfulltrúar Pírata upplýsa fólk um stöðu málsins.