Guðmundur Gunnarsson, bæjarstjóri Ísafjarðarbæjar, er allt annað en sáttur við framgöngu Óttars í þættinum og segir hann hafa slegið Vestfirðinga með „svellkaldri rasistatusku“ í andlitið. Guðmundur segir að Óttar hafi farið fram með rangfærslur og rasisma í málflutningi sínum þegar hann talaði gegn sjókvíaeldi á Vestfjörðum.
Þetta kemur fram í Facebookfærslu Guðmundar sem segir í inngangi hennar:
„Ég horfði á viðtal við lögmann Náttúruverndarsamtakanna í Kastljósi í kvöld. Ég ætla ekki einu sinni að reyna að leiðrétta einstakar fullyrðingar um starfsemi fyrirtækjanna hérna fyrir vestan. Enda átti lögmaðurinn í mestu vandræðum með að ráfa, þó ekki væri nema í námunda við eitt einasta sannleikskorn í sínum málfutningi.“
Því næst víkur Guðmundur að því sem hann segir vera grímulausa andúð lögmannsins á útlendingum:
„Það sem sló mig samt miklu meira en allar rangfærslurnar, var þessi grímulausa andúð lögmannsins á fólki af erlendum uppruna. Þetta eru semsagt ekki alvöru störf og alvöru fólk hérna fyrir vestan, heldur bara „einhverjir útlendingar (aðallega Pólverjar)“ sem geta bara farið eitthvað annað.“
Og síðan lýkur Guðmundur færslu sinni á nokkrum orðum um fjölmenningarsamfélagið sem hefur lánast að byggja upp á Vestfjörðum:
„ég varð eiginlega bara dapur. Ekki reiður, heldur dapur. Aðallega lögmannsins vegna, en líka vegna þess að hér stöndum við, í okkar ljómandi fallega fjölmenningarsamfélagi fyrir vestan, sem okkur hefur lánast að byggja upp og viðhalda af myndarbrag. En fáum svo eina svona svellkalda rasistatusku í andlitið í einhverju karlakarpi um eitthvað allt annað mál og veigaminna.
Takk fyrir það, laxmaður.”
