Sólveig Anna Jónsdóttir, formaður Eflingar-Stéttarfélags, hefur lýst yfir stuðningi sínum við Drífu Snædal, framkvæmdarstjóra Starfsgreinarsambandsins, í kjörinu um forsetaembætti ASÍ.
Sólveig segir um Drífu, að hún sé „sönn baráttumanneskja og talsmaður fyrir hagsmunum láglaunafólks á Íslandi.“ Hún tilheyri „framvarðasveit þeirra sem barist hafa ötullega gegn þeirri viðurstyggilegu framkomu sem tíðkast gagnvart viðkvæmasta hópi þeirra sem starfa hér á landi; aðflutts verkafólks sem lendir í margþættum vanda og á sér fáa málsvara.“
Þá segir Sólveig að í þeirri baráttu sem framundan sé, „þar sem verkafólk og láglaunafólk hyggst sækja efnahagslegt og samfélagslegt réttlæti sér til handa“ skipti máli hver leiði ASÍ:
„Ég tel að embætti forseta ASÍ eigi að vera skipað manneskju eins og Drífu; manneskju sem hefur sýnt og sannað að hún stendur með því fólki sem á undir högg að sækja á íslenskum vinnumarkaði, manneskju sem skilur að sú mikla misskipting sem nú er til staðar á Íslandi er uppspretta stórkostlegra vandamála og að ráðast verður í það mikilvæga verkefni að búa verka og láglaunafólki gott og mannsæmandi líf. Ég lýsi því hér með yfir stuðningi við Drífu Snædal í embætti forseta Alþýðusambands Íslands.“
Gylfi Arnbjörnsson, forseti ASÍ, lýsti því yfir í sumar að hann hygðist ekki gefa kost á sér í embættið að nýju.