Vaxandi stuðningur er fyrir aðild að Evrópusambandinu og því að taka upp aðildarviðræður að nýju, samkvæmt könnun sem Gallup gerði fyrir Já Ísland. Fleiri Íslendingar vilja taka upp evru í stað þess að halda íslensku krónunni, samkvæmt tilkynningu frá Já Ísland.
Samkvæmt könnuninni fer stuðningur við aðild að Evrópusambandinu vaxandi þar sem um 43% landsmanna eru nú fylgjandi aðild en 57% á móti. Stuðningur við aðild hefur aukist um tvö og hálf prósentustig frá því í september 2017 en níu prósentustig miðað við febrúar 2017.
Athygli vekur að yngsti aldurshópurinn (18 – 24 ára) segist líklegastur til að kjósa með aðild eða um 49%.
Þeim sem vilja taka upp aðildarviðræður við Evrópusambandið á ný hefur sömuleiðis fjölgað þar sem 40% eru því hlynntir eða um tveimur prósentustigum fleiri en í september 2017. Rúmlega 44% eru andvígir því að hefja aðildarviðræður að nýju en um 15% eru hlutlausir.
Þá eru verulega fleiri landsmenn fylgjandi því að taka upp evru eða 46% á móti ríflega 36% sem eru því á móti. Er þetta í fyrsta skiptið frá því að hafið var að kanna viðhorf almennings til gjaldmiðilsins að fleiri eru fylgjandi því að taka upp evru heldur en að halda í krónuna.
Samtökin Já Ísland eru „sameiginlegur vettvangur Evrópusinna, einstaklinga og samtaka. Það er samfélag þeirra sem vilja vinna að aðild Íslands að Evrópusambandinu með því að stuðla að hagstæðum aðildarsamningi og upplýstri og öfgalausri umræðu um aðildina,“ samkvæmt heimasíðu.
Framkvæmdatími 13. – 25. september 2018
Aðferð Netkönnun
Úrtak 1409 manns af öllu landinu, 18 ára og eldri, handahófsvaldir úr Viðhorfahópi Gallup
Úrtak 1409
Svara ekki 648
Fjöldi svarenda 761
Þátttökuhlutfall 54%