Umhverfissamtökin Landvernd birtu í morgun áróðursmyndband er nefnist „Hvað felst í Hvalárvirkjun?“ Þar eru tilgreindar neikvæðar afleiðingar þess að virkjunin rísi í Árneshreppi, en framkvæmdir eru áætlaðar í Ingólfsfirði, Ófeigsfirði og á Ófeigsfjarðarheiði.
Vitnað er í Skipulagsstofnun, sem sagði að áhrif Hvalárvirkjunar á landslag og víðerni verði „verulega neikvæð“.
Þá eru sýndar landslagsmyndir frá svæðinu, af fossum og fallegu víðerni og tilgreint að virkjanaframkvæmdirnar felist í fimm stíflum, fjórum lónum, skurðum, göngum, stöðvarhúsi, veglagningu, efnistöku og flutningi á jarðvegi, sem hafa muni áhrif á vötn og fossa er njóta verndar samkvæmt náttúruverndarlögum.
Ekki er tilgreint í myndbandinu um aðrar leiðir til að auka raföryggi á Vestfjörðum, en talsmenn virkjunarinnar hafa bent á að með Hvalárvirkjun gæti flutningsöryggi þúsundfaldast, sé rétt haldið á spöðunum, enda sé enginn annar virkjunarkostur í boði sem ráði við álagið. Þá sé um að ræða vistvænustu orku sem í boði sé.