Gunnar Smári Egilsson, stofnandi Sósíalistaflokksins, veltir því upp hvort það sé kominn tími til að fella styttuna af Ingólfi Arnarsyni á Arnarhóli. Ástæðan er að Ingólfur var þrælahaldari, stingur Gunnar Smári upp á að það ætti frekar að reisa styttu af Dúfþak, írskum þræl Ingólfs, í staðinn.
Það er ekki víst hversu mikil alvara er að baki uppástungu Gunnar Smára á Fésbók en hann notar Ingólf sem dæmi um þrælahaldara sem haldið sé upp á í stað þeirra sem gera uppreisn gegn þrælahöldurum.
„Þegar þrælar drápu þrælahaldara sinn á Hjörleifshöfða við upphaf Íslandsbyggðar hófst alþýðuuppreisn Íslendinga. Þegar þrælahaldarinn Ingólfur Arnarsson elti foringja þrælauppreisnarinnar út í Vestmannaeyjar og drap þá alla koðnaði alþýðuuppreisnin niður. Og hefur legið niðri síðan,“ segir Gunnar Smári. Bendir hann á að Íslendingar reistu styttu af Ingólfi, en flestir hafi gleymt nöfnum þrælanna: „…frelsishetjanna sem risu upp gegn ánauð og kúgun þrælahaldarana. Kannski er kominn tími til að fella Ingólf af stalli sínum og reisa styttu af írska þrælnum Dufþak í staðinn.“