Ragnar Þór Ingólfsson, formaður VR, er gagnrýninn á fjárlagafrumvarpið sem kynnt var í gær. Hann minnist á að persónuafsláttur hækki um heilar 539 krónur og að Bjarni Benediktsson, fjármálaráðherra, tali um „veislu“ meðan fólk sé að „gefast upp“:

„Persónuafsláttur hækkar um 539 kr. Hluta af skertum barnabótum skilað til baka. Vörugjöld á bensín og bifreiðar hækka. Vaxtabætur lækka um 600 milljónir. Heildsalar og framleiðslufyrirtæki eru að hækka verð. Krónan hefur veikst um 7-8% gagnvart USD og Evru frá 1.Ágúst. Seðlabankinn hótar vaxtahækkunum verði launahækkanir umfram 4%. Fjármálaráðherra talar um veislu á meðan fólkið okkar er að gefast upp.“

Ragnar Þór spyr einnig hvernig samfélagi við ætlum að skila til afkomenda okkar:

„Kynslóðirnar á undan náðu fram, með þrotlausri baráttu, öllum þeim réttindum og lífsgæðum sem við þekkjum í dag. Hvernig samfélagi ætlum við að skila til afkomenda okkar? Ætlum við að skila af okkur samfélagi betri lífskjara eða vera kynslóðin sem taldi lífskjarabaráttuna snúast um okkur sjálf eða hvað er í þessu fyrir mig á meðan innviðir samfélagsins molna undan okkur? Ætlum við að láta þetta yfir okkur ganga eða standa saman í að bæta lífskjör þannig að við getum búið í samfélagi þar sem hægt er að lifa með mannlegri reisn af dagvinnulaunum og fá ekki lífstíðar fátæktardóm ef eitthvað kemur uppá?“