Ársskýrslur ráðherra eru nú birtar í fyrsta skipti samkvæmt 62. gr. laga nr. 123/2015, um opinber fjármál. Í lögunum er kveðið á um að hver ráðherra skuli birta slíka skýrslu þar sem gera skal grein fyrir útgjöldum málefnasviða og málaflokka og bera saman við fjárheimildir fjárlaga.
Í ársskýrslunum skal gera grein fyrir fjárveitingum til einstakra ríkisaðila og verkefna og leggja mat á ávinning af þeim með tilliti til aðgerða og markmiða sem sett hafa verið fram í fjármálaáætlun. Ársskýrslunum er þannig ætlað að stuðla að auknu gagnsæi um ráðstöfun og nýtingu fjármuna og vera um leið traustur grundvöllur fyrir umræðu um stefnumörkun og forgangsröðun hins opinbera, samkvæmt tilkynningu.
„Markmiðið með ársskýrslunum er að fyrir liggi heildstæð og greinargóð samantekt um þróun útgjalda og mat á árangri í samanburði við sett markmið í því skyni að skýra samhengi fjármuna og stefnumótunar. Þannig verði tryggð góð yfirsýn og eftirfylgni með framgangi settra markmiða í fjármálaáætlun á einstökum málefnasviðum sem ráðherrar bera ábyrgð á.
Vakin er athygli á því að ársskýrslurnar eru birtar með fyrirvara um fjárhæðir þar sem endanlegur ríkisreikningur ársins lá ekki fyrir við gerð þeirra. Því er mögulegt að fjárhæðir í skýrslunum geti tekið einhverjum breytingum við lokafrágang ríkisreiknings og verða skýrslurnar þá uppfærðar eftir því sem við á.“
