Virðisaukaskattur verður ekki afnuminn af bókum, fram kemur í greinargerð fjárlagafrumvarps ríkisstjórnarinnar að ef það yrði gert myndi það flækja virðisaukaskattkerfið og dregið úr skilvirkni þess. Til stóð að afnema skattinn á haustmánuðum 2017 en því var ekki fylgt eftir í fjárlögum það árið þrátt fyrir þverpólitíska samstöðu í málinu, stigu bókaútgefendur fram og töldu að um svik væri að ræða af hálfu Lilju Alfreðsdóttur menntamálaráðherra. Hefur ráðherra verið afdráttarlaus með skoðun sína að það eigi að afnema virðisaukaskatt á bækur.
Áformum um að afnema skattinn var fagnað af flokksmönnum Vinstri grænna þegar ríkisstjórnarsáttmáli var kynntur í nóvember í fyrra.
Í greinargerð fjárlaga í ár segir að í stjórnarsáttmálanum og í fjármálaáætlun 2019–2023 væri lýst yfir þeim áformum að afnema VSK af bókum. Við undirbúning lagabreytingarinnar hafi verið leitað annarra leiða en þeirrar að taka upp núllþrep í VSK fyrir bókaútgáfu sem dregið hefði úr skilvirkni VSK-kerfisins, auk þess að flækja það. Niðurstaðan sé því sú að í stað þess að afnema VSK verði tekinn upp sérstakur stuðningur við útgefendur bóka á íslensku. Frumvarp þess efnis er lagt fram samhliða fjárlagafrumvarpinu.
Heiðar Ingi Svansson, formaður Félags íslenskra bókaútgefenda, segir í samtali við Eyjuna að verið sé að fara yfir stöðuna:
„Okkar viðbrögð eru engin meðan að málið liggur ekki alveg fyrir. Það er talað um beinan stuðning við bókaútgefendur í staðinn, sem er þá sambærilegt og við tónlistar- og kvikmyndageirann og við erum alveg tilbúin að skoða aðrar útfærslur. Niðurfelling virðisaukaskattsins er ein leið, en það eru auðvitað aðrar leiðir í boði sem má skoða,“
segir Heiðar Ingi. En telur hann að ráðherra og ríkisstjórnin hafi hlaupið á sig með því að lofa niðurfellingu virðisaukaskattsins ?
„Ég veit það ekki, það fer eftir niðurstöðunni, hvor útfærslan verði betri. Það sem er mikilvægast í þessu er að við fáum stuðning, tölfræðin síðasta áratuginn sýnir það svart á hvítu.“