Fréttamiðlar í Bretlandi hafa vitnað oftar en 100 sinnum í tíst rússneskra nettrölla, samkvæmt rannsókn The Guardian í Bretlandi.

Fréttirnar fjölluðu til dæmis um Donald Trump, Bandaríkjaforseta, Donald Glover, leikstjóra og tónlistarmann og Lenu Dunham, leikkonu og leikstjóra.

Bandaríska þingið birti upplýsingar um 1000 Twitter reikninga í júní, sem taldir eru koma frá Internet Research Agency (IRA), ríkisstuddu upplýsingafyrirtæki frá St. Pétursborg í Rússlandi, sem sérhæfir sig í upplýsingamengun.

Áður var vitað um 2000 Twitter reikninga frá fyrirtækinu og því ber það ábyrgð á yfir 3000 fölskum Twitter reikningum, sem hafa það að markmiði að afvegaleiða umræðu og fréttir.

Meðal þeirra miðla sem vitnuðu í falsreikningana eru BBC, The Telegraph, The Guardian, en bæði BBC og The Guardian hafa fjarlægt tístin úr fréttum sínum og viðurkennt að um falsreikninga var að ræða.