Flugsýningin sem haldin var í Reykjavík á laugardag var tveimur flugvélum fátækari en ráð var fyrir gert. Til stóð að tvær herþotur, af gerðinni Eurofighter, sem nú sinna loftrýmisgæslu NATO hér á landi, yrðu með í sýningunni og höfðu aðstandendur sýningarinnar útvegað öll tilskilin leyfi frá Reykjavíkurborg.
Hinsvegar barst tilkynning frá borgaryfirvöldum á fimmtudag, um að herþoturnar mættu ekki taka þátt. Matthías Sveinbjörnsson, forseti Flugmálafélags Íslands sagði við Eyjuna að borgarstjóri hefði beitt sér sérstaklega í málinu:
„Undir eðlilegum kringumstæðum er það ekki þannig að borgarstjóri fari með loftrýmisvald í Reykjavík, en hann vísar í samkomulag frá 2013, sem Jón Gnarr borgarstjóri og Ögmundur Jónason, þáverandi innanríkisráðherra gerðu, en þar er talað um að hertengd starfssemi eigi ekki að fara fram á Reykjavíkurflugvelli. Samt var Heilbrigðiseftirlit Reykjavíkurborgar búið að samþykkja flugið, gegn því að við gætum tryggt að hávaði yrði í lágmarki og aðeins yfir flugvallarsvæðinu og viðburðurinn yrði auglýstur þannig að ekki færi á milli mála hvað myndi fara þarna fram, sem og var ætlunin,“
segir Matthías og vísar til þess að í fyrrasumar flaug kanadísk herþota yfir borgina á flugsýningunni, sem varð til þess að Dagur B. Eggertsson borgarstjóri ítrekaði að hann hefði ekki gefið leyfi til þess, en einhverjar kvartanir bárust vegna hávaðans sem af fluginu hlaust.
Vísaði Dagur í áðurnefnt samkomulag ríkis og Reykjavíkurborgar frá 2013, þar sem tilgreint er að herflugvélar eigi ekki heima á Reykjavíkurflugvelli, nema um björgunarverkefni eða sérstakar ástæður væri að ræða.
Dagur vísaði aftur til þessa samkomulags fyrir bannið á fluginu í ár, sem Matthías segir vera tvískinnung:
„Það hafa flugvélar frá bandaríska hernum verið að fljúga um Reykjavíkurflugvöll æ síðan, án þess að borgin geri sérstakar athugasemdir við það. Ástæðan fyrir því að við erum ósáttir við þessa ákvörðun er að þarna er ekki um hernaðartengda starfsemi að ræða á nokkurn hátt, en andi samkomulagsins frá 2013 miðar einmitt að því. Á meðan er Reykjavíkurborg að horfa í gegnum fingur sér með annarskonar flug herflugvéla, eins og þegar Danadrottning lenti hér í herflugvél danska flughersins og komu forsætisráðherra og forseta hingað til lands, í merktum herflugvélum. Ég hélt líka að það væri ákveðin sátt varðandi þessi mál, að skoða nýja valkosti varðandi flugvallarstæði og koma til móts við þarfir borgarinnar, en þegar við biðjum um svona lítilræði, þá er bara vísað í samkomulag og hlutirnir túlkaðir á þrengsta veg. Þetta er allt hið leiðinlegasta mál og tvískinnungurinn alger.“
Matthías segir að farið verði lengra með málið:
„Já við reiknum með að kanna betur réttmæti þess að borgin beiti sér með þessum hætti. Því nú er annað hernaðarbrölt ekki bannað, til dæmis í höfnum þegar hingað koma herskip. Ég veit ekki til þess að herflutningar séu bannaðir á götum borgarinnar heldur, það skýtur því skökku við að hertól séu eingöngu bönnuð á Reykjavíkurflugvelli, en ekki annarsstaðar.“
Í fyrra vísaði Dagur til þess að hávaði hafi hlotist af flugi herþotunnar yfir friðlandi fugla á viðkvæmum varptíma, sem væri fáránlegt. Hann vísaði þó ekki til neins hávaða í þetta skiptið, sem forsendu fyrir banninu:
„Ef hávaði hefði verið notaður sem afsökun, þá er rétt að minnast þess að sama dag var Októberfest haldið hjá Háskóla Íslands, þar sem mikið var kvartað undan hávaða, en það var þó samþykkt af borginni og mætti borgarstjóri sjálfur þangað í góðu yfirlæti. Á meðan erum við með okkar skemmtun, bara augljóslega ekki í náðinni. Þetta er ákveðinn tvískinnungur þykir mér og sorglegt hvernig meðferð flugið fær.“
