Karen Kjartansdóttir, fyrrum upplýsingarfulltrúi United Silicon, hefur verið ráðin sem nýr framkvæmdarstjóri Samfylkingarinnar. Vísir greinir frá.

Karen tekur við af Kristjáni Guy Burgess, sem lét af störfum árið 2016, í kjölfar slæms gengis Samfylkingarinnar í alþingiskosningum.

Karen segist við Vísi ekki veigra sér að taka við ögrandi verkefnum, hún sé haldin einskonar „áskorunarfíkn“ og sóknarfæri séu í stöðunni fyrir flokkinn:

„Og ef við gefum okkur að ekki verði kosið alveg á næstunni get ég ekki séð annað en það verði mjög gaman að koma að uppbyggingu þessa flokks og skýra stefnuna. Ég brenn fyrir fólki, venjulega horfi ég á pólitík út frá fólki. Stefnumál Samfylkingar í grunninn, sem byggjast á frjálslyndi og víðsýni, er nokkuð sem ég hef alltaf tengt mjög við.“

Karen sótti um að stýra Morgunútvarpi Rásar 2 í fyrra og hlaut hún stöðuna, en afþakkaði hana til þess að komast að hjá United Silicon. Áður var hún hjá Samtökum fyrirtækja í sjávarútvegi, frá 2013-2016.

Uppfært

Tilkynning Samfylkingarinnar um ráðningu Karenar:

„Karen Kjartansdóttir hefur verið ráðin í stöðu framkvæmdastjóra hjá Samfylkingunni – jafnaðarmannaflokki Íslands.

Karen hefur mikla reynslu af störfum við verkefna- og viðburðastjórnun, fjölmiðlum og kynningarmál. Hún lætur af störfum hjá ráðgjafafyrirtækinu ATON þar sem hún hefur starfað við skipulagða upplýsingamiðlun og almannatengsl. Hún hefur áður starfað sem samskiptastjóri SFS, blaðamaður og pistlahöfundur á DV og einnig sem fréttamaður og varafréttastjóri á Stöð 2. Karen er með MBA gráðu frá Háskólanum í Reykjavík og BA gráðu í bókmenntafræði frá Háskóla Íslands. Þá hefur Karen unnið fjölda trúnaðarstarfa fyrir félagasamtök og félög í atvinnulífinu.

„Mér finnst sérstaklega ánægjulegt að sjá hve stór hópur öflugra og hæfileikaríkra einstaklinga sýndu því áhuga að vinna með okkur að markmiðum Samfylkingarinnar og fyrir hugsjónum um betra samfélag. Á sama tíma og við bjóðum Karenu velkomna til starfa þökkum við öllum umsækjendum kærlega fyrir,” sagði Inga Björk Bjarnadóttir, formaður framkvæmdarstjórnar Samfylkingarinnar.“