Guðlaugur Þór Þórðarson utanríkisráðherra á skilið gott klapp á bakið vegna greinar sem hann skrifar í Fréttablaðið í dag í tilefni af því að íslensk sendinefnd situr nú sinn fyrsta fund í Mannréttindaráði Sameinuðu þjóðanna.

Grein Guðlaugs ber yfirskriftina Stöndum vörð um mannréttindi. Það sem vekur mesta athygli er að hann beinir spjótum sínum að Saudi-Arabíu. Nefnir mannskæðar loftárásir þeirra á Jemen og segir svo.

Ég hef gagnrýnt að í mannréttindaráðinu sitja ríki sem frekar ættu að vera umfjöllunarefni ráðsins en sitja í dómarasætinu. Sádi-Arabía, Venesúela og Filippseyjar hafa gerst sek um alvarleg mannréttindabrot – svo þrjú nærtæk dæmi séu nefnd. Við erum óhrædd við að gagnrýna þau og brýna. Um leið væntum við góðs af samstarfi við ríki í ráðinu sem deila með okkur grundvallarafstöðu til mannréttindamála.

Þess er skemmst að minnast að Margot Wallström, utanríkisráðherra Svía, gagnrýndi Sauda vegna kvennakúgunar fyrir fáum árum. Það vakti ekki mikla lukku í Riyadh og bæði Karl Gústaf kóngur og Stefan Löfven skrifuðu leynileg bréf þar sem þeir reyndu að friðmælast við Saudana. Wallström fagnaði því síðar að samskiptin við Saudi-Arabíu hefðu komist í „eðlilegt horf“.