Frjálsi lífeyrissjóðinn hefur sent frá sér athugasemd við frétt Eyjunnar um gagnrýni Ragnars Þórs Ingólfssonar, formanns VR, á ávöxtun Frjálsa lífeyrissjóðsins. Ragnar gaf í skyn að Frjálsi lífeyrissjóðurinn hefði stundað blekkingar við miðlun upplýsingar um ávöxtun sjóðsins, og að sjóðurinn hafi undanfarið skilað lakari ávöxtun en Almenni lífeyrissjóðurinn. Sjá nánar hér.

Frjálsi lífeyrissjóðurinn segir Ragnar Þór beita villandi samanburði og hafnar samanburði hans í eftirfarandi tilkynningu:

„Frjálsi lífeyrissjóðurinn hafnar villandi samanburði Ragnars Þórs Ingólfssonar formanns Verslunarmannafélags Reykjavíkur á ávöxtun lífeyrissjóða sem er birtur á vef DV í dag.

Ragnar heldur því fram að Frjálsi lífeyrissjóðurinn hafi skilað lakari ávöxtun á sl. 3 árum en Almenni lífeyrissjóðurinn. Þetta er rangt hvort sem horft er til samtryggingardeildar eða sjóðsins í heild (samtrygging og séreign samanlagt).

Ragnar tekur ekki tillit til þess að samtryggingardeild Frjálsa lífeyrissjóðsins gerir skuldabréf að hluta upp á kaupkröfu en Almenni lífeyrissjóðurinn á markaðskröfu.

Samkvæmt úttekt ráðgjafafyrirtækisins Analytica er raunávöxtun samtryggingadeildar Frjálsa sl. 3 ár reiknuð á markaðskröfu 5,20% (ekki 3,96%) eftir kostnað á móti 4,77% hjá Almenna. Þá skilaði Frjálsi í heild 4,43% ávöxtun á sama tímabili á móti 4,02% hjá Almenna. Frjálsi hafnar jafnframt umfjöllun Ragnars um rekstarkostnað sjóðsins og vísast til fréttar á vef sjóðsins frá því í gær.“