Brottfarir erlendra farþega frá Íslandi um Keflavíkurflugvöll í ágúst síðastliðnum voru um 276 þúsund talsins samkvæmt talningum Ferðamálastofu og Isavia í Flugstöð Leifs Eiríkssonar eða tæplega átta þúsund færri en í ágúst á síðasta ári.
Færri brottfarir í ágúst milli ára má einkum rekja til Þjóðverja, Frakka, Kanadamanna og Breta sem fækkaði á bilinu 15-26%. Bandaríkjamenn voru langfjölmennastir í ágúst í ár og fjölgaði þeim verulega frá árinu áður eða um 23,8%.
Sé litið til nýliðins sumars í heild má sjá mun minni fjölgun í brottförum erlendra farþega en síðustu ár. Þannig var aukning yfir sumarmánuðina nú 1,4% á milli ára samanborið við 17,1% aukningu milli ára 2016-2017, 30,9% milli ára 2015-2016 og 24,4% milli ára 2014-2015.
Frá áramótum hafa tæplega 1,6 milljónir erlendra farþega farið frá Íslandi um Keflavíkurflugvöll sem er 3,4% fjölgun miðað við sama tímabil í fyrra.
Brottfarir erlendra farþega frá Íslandi voru um 276 þúsund í ágúst síðastliðnum eða tæplega átta þúsund færri en í ágúst á síðasta ári. Fækkunin nemur 2,8% milli ára. Í samanburði við árin þar á undan fjölgaði brottförum um 17,6% milli ára 2016-2017, 27,5% milli ára 2015-216 og 23,4% milli ára 2014-15.
Sé litið til brottfara í ágúst nú hefur orðið tæp tvöföldun frá árinu 2014. Fjölgunin hefur að jafnaði verið 16,4% á milli ára á tímabilinu.
Þegar litið er til 12 fjölmennustu þjóðernanna má sjá að Bandaríkjamenn eru langfjölmennastir í ágúst eða þriðjungur farþega. Brottfarir Bandaríkjamanna voru um 92 þúsund talsins í ágúst og fjölgaði um tæp 18 þúsund milli ára eða 23,8%.
Næstfjölmennastir voru Þjóðverjar og Frakkar með 13,6% hlutdeild en Þjóðverjum fækkaði um 25,9% milli ára og Frökkum um 17,6%. Fækkun var milli ára hjá átta af þeim níu þjóðernum sem fylgdu þar á eftir. Einungis Pólverjum fjölgaði í ágúst milli ára og það um 22,1%.
Sé sumarið (júní-ágúst) í heild skoðað má glögglega sjá að dregið hefur verulega úr fjölgun brottfara erlendra farþega. Á myndinni hér til hliðar má sjá samanburð fjögur ár aftur í tímann. Fjölgunin í sumar var 1,4% frá því í fyrra, í samanburði við 24,2% milli ára 2014-15, 30,9% milli ára 2015-216 og 17,1% milli ára 2016-2017.
Sé breytingin skoðuð nánar má sjá fækkun frá öllum mörkuðum í ár frá því í fyrra nema frá Norður-Ameríku og þeim löndum sem falla undir „annað“. Þannig fækkaði Norðurlandabúum um 18%, Bretum um 12% og Mið- og Suður-Evrópubúum um 16%.
Þegar er horft er lengra aftur í tímann má sjá í langflestum tilfellum aukningu milli ára, þá einkum frá Norður Ameríku en Norður-Ameríkubúum fjölgaði mest, eða um 54% milli ára 2014-2015 og 65% milli ára 2015-2016. Um er að ræða nærri fjórföldun Ameríkana á tímabilinu.
Þegar hlutfallsleg samsetning brottfara að sumri (júní-ágúst) er skoðuð síðastliðin ár má sjá að hún hefur breyst nokkuð eins og sjá má að grafinu hér til hliðar. Árið 2018 voru um tveir af hverjum fimm farþegum frá Norður-Ameríku en hlutdeild þeirra hefur aukist ár frá ári. Á sama tíma hefur hlutdeild Norðurlandabúa, Breta og Mið- og Suður-Evrópubúa minnkað. Hlutdeild þeirra sem falla undir annað hefur verið á líku róli frá 2014 eða á bilinu 22,1% til 24,7%.
Fjölgun þjóðerna í brottfarartalningu Ferðamálastofu og Isavia í júní 2017 hefur gefið betri mynd af samsetningu farþega eftir markaðssvæðum. Eins og sjá má af gröfum hefur Norður-Ameríkönum fjölgað mikið milli ára 2017-2018 og þar með aukið hlutdeild sína. Mið-Evrópa er annað stærsta markaðssvæðið í sumar með 18% hlutdeild, þar á eftir koma Asíulönd með um 8% af markaðinum, Norðurlandabúar með 7% og Bretar, Suður-Evrópubúar og Austur-Evrópubúar með 6% hver.
Um 53 þúsund Íslendingar fóru utan í ágúst í ár eða 1% færri en í ágúst 2017. Brottfarir í sumar voru tæplega 191 þúsund talsins árið 2018 eða 6,8% fleiri en árið 2017.
Samtals voru brottfarir Íslendinga á tímabilinu janúar til ágúst um 442 þúsund talsins eða 9,2% fleiri en á sama tímabili árið 2017.