Það hefur lengi verið nokkuð furðulegt ástand í bandaríska sendiráðinu í Reykjavík. Eins og frægt var móðgaði Ólafur Ragnar Grímsson einn af fyrri sendiherrum, Carol von Voorst. Hún var kölluð til Bessastaða til að veita viðtöku fálkaorðunni, en þegar hún var á leið þangað fékk hún símtal þar sem henni var tilkynnt að hún myndi ekki fá orðuna.
Þetta þótti afar sérkennileg uppákoma og skýringarnar á henni hafa aldrei komið opinberlega fram. Sagan segir að ástæðan hafi verið sú að Ólafur sjálfur var móðgaður út í Bandaríkjastjórn. Eftir þetta leið nokkur tími og enginn bandarískur sendiherra kom til Íslands, heldur gengdu sendifulltrúar embættinu í forföllum.
Þegar öllu er á botninn hvolft eru sendiherrar kannski ekkert sérstaklega nauðsynlegir.
Síðasti sendiherra Bandaríkjanna á Íslandi var Robert C. Barber, lögfræðingur sem var skipaður af stjórn Obamas. Hann var semsagt ekki diplómati að atvinnu. Barber hvarf héðan í janúar 2017, stuttu eftir að Donald Trump tók við völdum og síðan, í eitt og hálft ár, hafa Bandaríkin ekki haft sendiherra á Íslandi.
En nú er bætt þar úr.
Tilnefningin kemur dálítið á óvart. Nýi sendiherrann heitir Jeffrey Ross Gunter. Hann er læknir, með sérhæfingu í húðsjúkdómum. Starfar samkvæmt Google í Arizona. Ekki verður séð að Gunther hafi starfað neitt á vettvangi alþjóðamála.
Hann virðist hins vegar hafa gefið einhverjar fjárhæðir til kosningabaráttu Trumps árið 2016 og hann hefur verið virkur í félagsskap gyðinga innan Repúblikanaflokksins, Republican Jewish Coalition.
Fyrir mann af þessu tagi er sjálfsagt nokkur upphefð að verða sendiherra. Svona gerast kaupin á eyrinni í bandarískum stjórnmálum.