Bubbi Morthens er ótrúlegur náungi.

Ég vann með honum í Fiskiðjunni í Vestmannaeyjum 1974. Ég var aðeins yngri en hann, bjó ekki í hinni frægu verbúð, en hef þekkt hann síðan.

Þá fannst mér hann vera furðuverk og svo er enn.

Í fyrra varð ég var við að krakkar í bekk sonar míns voru farin að hlusta á Bubba. 15 ára krakkar. Kári kom heim og fór með brot úr textum eftir Bubba.

Ég átti ekki alveg von á þessu.

Á menningarnótt var ég að ganga með Kára og níu ára frænda mínum. Ég sagði þeim að Bubbi gæti því miður ekki spilað vegna þess að hann hefði verið lagður á spítala með mein í nefi.

„Ooo,“ sagði níu ára strákurinn. „Mig langaði svo að sjá Bubba!“ Kári tók undir, þetta væru sannarlega vonbrigði.

Með þessu er  Bubba óskað góðs bata og megi hann sem fyrst fara aftur að gleðja unga og aldna með söng sínum og spili.