Samkvæmt gögnum sem vefritið Túristi hefur undir höndum, fluttu Íslensku flugfélögin Icelandair og Wow air ríflega 56 prósent farþeganna sem komu hingað til lands í fyrra. Alls 36 prósent farþega WOW árið 2017 voru á leið til Íslands, afgangurinn var annaðhvort tengifarþegar eða Íslendingar. Flutti WOW alls um hálfa milljón farþega til landsins.
Icelandair flutti alls 730 þúsund farþega til landsins í fyrra. Alls komu því um 1,2 milljónir ferðamanna hingað til lands á vegum Íslensku flugfélaganna, en samtals fóru 2,2 milljónir erlendra ferðamanna um Keflavíkurflugvöll á síðasta ári. Því er hlutdeild WOW og Icelandair samtals um 56 prósent.
Samkvæmt Túrista er vægið þó eflaust nokkuð hærra, því samkvæmt upplýsingum frá Icelandair teljast „stop-over“ farþegar sem tengifarþegar þó þeir dvelji hér í nokkra daga. Ekki er vitað hvort WOW telji tengifarþega sína með sama hætti, en ef svo er mun vægið hækka sem því nemur.
