Hannes Hólmsteinn Gissurarson, prófessor í stjórnmálafræði við Háskóla Íslands, er þekktur fyrir hægri-sinnaðar skoðanir sínar, en hann er sagður helsti hugmyndafræðingur frjálshyggjustefnu Sjálfstæðisflokksins í valdatíð Davíðs Oddsonar sem forsætisráðherra. Hafa vinstri menn lengi haft horn í síðu Hannesar og ekki loku fyrir það skotið að tilfinningin sé gagnkvæm.
Hannes skrifaði fyrir stuttu að „hægrið“ ætti „miklu skemmtilegri og snjallari hugsuði en vinstrið“ og hélt áfram á sömu braut í gær:
„Auðvitað eru til mjög snjallir og skemmtilegir vinstri sinnaðir hugsuðir, jafnvel einhverjir þeirra lífsglaðir. En þorri vinstri sinnaðra menntamanna þjáist af tvennu: Þeir eru fýlupokar, nöldurskjóður, sem sjá glasið alltaf hálftómt, ekki hálffullt. Þeim líður illa í heimi, sem tekur ekki nægilegt tillit til þeirra að þeirra dómi. Og þeir eru mjög háðir öðrum, ósjálfstæðir, bergmál frekar en raddir. Þeir eru pabbastrákar, og pabbi þeirra er hópurinn, hinir vinstri sinnuðu menntamennirnir, enda ráða þeir öllu í háskólum og fjölmiðlum. En að því sögðu skulum við taka upp léttara hjal!“