Í gær greindi RÚV frá því að Elliði Vignisson, nýráðinn bæjarstjóri sveitarfélagsins Ölfuss, fái 1.650 þúsund krónur í laun á mánuði, sem er 70 þúsund krónum meira en forveri hans, Gunnsteinn Ómarsson, samkvæmt fundargerð bæjarstjórnar.
Gunnar Smári Egilsson, stofnandi Sósíalistaflokks Íslands, telur laun Elliða allt of há, en hann segir borgarstjóra Parísar ekki fá svo há laun, þrátt fyrir mikinn mun á íbúafjölda:
„Hærri laun en borgarstjóri Parísar fyrir að stýra Ölfus, sveitarfélagi með tvö þúsund íbúa. París er ellefu hundrað sinnum fjölmennara sveitarfélag. Sjálfstæðismenn ættu ekki að koma nærri opinberum sjóðum, þeir nota þá til eigin nota.“
Í athugasemdarkerfi Gunnars Smára hefur spunnist umræða um hvað teljist sanngjörn laun bæjarstjóra.
Gunnar Smári vill miða við þreföld lágmarkslaun:
„Lágmarkslaun eru 300 þús. kr. á mánuði. Þreföld lágmarkslaun eru 900 þús. kr. á mánuði. Er það ekki ágætt viðmið; að hæstu laun séu ekki hærri en þreföld lægstu laun? Annaðhvort að lækka Elliða niður í 900 þús. kr. á mánuði eða hækka lægstu laun í 567 þús. kr. á mánuði.“
Þess má geta að borgarstjóri Parísar er Anne Hidalgo og er hún með alls 8.650 evrur á mánuði, eða um 1,1 milljón íslenskar krónur.
Íbúafjöldi Parísar er rúmlega 2.2 milljónir.
