Þann 1. ágúst sl. tók gildi reglugerð dómsmálaráðherra um breytingu á reglugerð um skilyrði gjafsóknar og starfshætti gjafsóknarnefndar nr. 45/2008.
Breytingin felur í sér hækkun viðmiðunarfjárhæða gjafsóknar. Þannig mun við mat á því hvort veita skuli einstaklingi gjafsókn framvegis miða við að tekjur hans nemi ekki hærri fjárhæð en kr. 3.600.000 í stað kr. 2.000.000 áður. Sama upphæð fyrir hjón eða sambúðarfólk hækkar úr kr. 3.000.000 í kr. 5.400.000. Þá skulu viðmiðunarmörk tekna hækka um kr. 400.000 fyrir hvert barn á framfæri umsækjanda í stað kr. 250.000 áður.
Loks er kveðið á um það í reglugerðinni að framangreindar fjárhæðir taki breytingum miðað við vísitölu neysluverðs 1. janúar ár hvert.
Reglugerðin tók sem fyrr segir gildi þann 1. ágúst nk. og gildir hún jafnt um ný mál sem og um gjafsóknarumsóknir sem borist hafa fyrir það tímamark en hafa ekki verið afgreiddar.
Samkvæmt Vísindavefnum er gjafsókn samheiti fyrir „aðstoð sem aðili getur leitað til að sækja hagsmuni sína eða verja þá í dómsmáli“. Samkvæmt þessu er gjafsókn fjárhagsleg aðstoð til gjafsóknarhafa og er þeirri aðstoð meðal annars ætlað að koma til móts við kostnað vegna málflutnings fyrir hönd gjafsóknarhafans og hinna ýmsu gjalda, sem hann þarf að standa skil á vegna málsins.
Reglugerðin á vef Stjórnartíðinda https://www.stjornartidindi.is/Advert.aspx?RecordID=334b3714-5b28-4eeb-b9b8-2ffed44ee4d5