Björn Bjarnason, fyrrum ráðherra og þingmaður Sjálfstæðisflokksins, er gagnrýninn í garð Drífu Snædal, framkvæmdarstjóra Starfsgreinarsambandsins, en hún staðfesti framboð sitt til forsetakjörs ASÍ fyrr í dag.
Björn hnýtur um orðalagið í yfirlýsingu Drífu hvar segir: „Síðustu áratugi hefur hallað undan fæti í samfélaginu hér heima og heiminum öllum.“
„Þarna er sérkennilega að orði komist en í samræmi við það að þeir sem eru í forystu íslenskrar verkalýðshreyfingar virðast með öllu fráhverfir þeirri hugsun að með þátttöku þeirra hafi orðið mestu félagslegar og efnalegar framfarir í sögu þjóðarinnar, einmitt síðustu áratugi. Á árunum frá 2014 hefur kaupmáttur til dæmis aukist um 30% svo að nærtækt dæmi sé tekið. Sé þetta dæmi nefnt leggjast margir á eitt að gera sem minnst úr gildi þess fyrir almenna launþega!“
Björn segir að fyrir áratug hafi evran verið eitt helsta baráttumál forystumanna ASÍ:
„Drífa Snædal minnist ekki einu orði á samskipti út á við eða evruna. Á hinn bóginn vekur athygli að á FB-síðu sinni birtir Drífa framboðsyfirlýsingu sína bæði á íslensku og ensku sem segir sitt um fjölgun félagsmanna ASÍ með annað móðurmál en íslensku. Nú er spurning hvort einhver býður sig fram á vettvangi ASÍ með upptöku evrunnar að leiðarljósi. Á árum áður voru forystumenn ASÍ og Samfylkingarinnar samstiga í evru-baráttunni. Kæmi evru-frambjóðandi fram innan ASÍ að þessu sinni nyti hann stuðnings forystumanna Viðreisnar,“
segir Björn og finnur að grein Þorgerðar Katrínar Gunnarsdóttur, formanns Viðreisnar í Fréttablaðinu í dag, hvar hún mælir fyrir nýjum gjaldmiðli, þar sem ekki sé sanngjarnt að almenningur sitji eftir með krónuna og kostnaðinn sem henni fylgir á meðan tiltekin fyrirtæki tryggja sig með því að gera upp í erlendri mynt og hafa aðgang að ódýru erlendu fjármagni. Krónan hefur reynst okkur dýrkeypt spaug. Horfumst í augu við það.“
Björn segir hinsvegar að kaupmáttur íslensks almennings hafi einmitt vaxið meira en launþega í nokkru öðru evru-landi, með krónuna að vopni.
Að lokum segir Björn:
„Að segja að hallað hafi undan fæti í íslensku samfélagi og að halda því fram að íslenska krónan sé „dýrkeypt spaug“ er í ætt við þær upplýsingafalsanir sem barist er gegn á alþjóðavettvangi með þeim rökum að þær veiki traust á lýðræðislegum umræðum og baráttu.“